کوئٹہ :بلوچستان کے ضلع قلات میں سیکیورٹی فورسز نے خفیہ اطلاع پر کارروائی کرتے ہوئے فتنۃ الہندوستان سے تعلق رکھنے والے 4 بھارتی حمایت یافتہ دہشت گردوں کو ہلاک کرکے اسلحہ اور گولہ بارود برآمد کرلیا۔
پاک فوج کے شعبہ تعلقات عامہ (آئی ایس پی آر) کے مطابق یکم نومبر کی رات سیکیورٹی فورسز نے ضلع قلات میں بھارتی پراکسی فتنۃ الہندستان کے دہشت گردوں کی موجودگی کی اطلاع پر موثر کارروائی کی، جس کے نتیجے میں بھارتی سرپرستی کے حامل 4 دہشتگرد ہلاک ہوگئے۔
آئی ایس پی آر کے مطابق ہلاک دہشت گردوں سے اسلحہ و گولہ بارود برآمد ہوا ہے، دہشت گرد متعدد تخریبی کارروائیوں میں ملوث تھے، علاقے میں کلیئرنس و سینیٹائزیشن آپریشن جاری ہے۔
آئی ایس پی آر نے کہا ہے کہ ’عزمِ استحکام‘ کے تحت انسدادِ دہشتگردی مہم پوری قوت سے جاری رہے گی، پاکستان سے غیر ملکی سرپرستی میں کی جانے والی دہشت گردی کا مکمل خاتمہ قومی عزم ہے۔
صدر آصف علی زرداری اور وزیراعظم شہباز شریف کا کامیاب آپریشن پر سیکیورٹی فورسز کو خراج تحسین
صدرِ مملکت آصف علی زرداری اور وزیراعظم محمد شہباز شریف نے بلوچستان کے ضلع قلات میں کامیاب انٹیلی جنس بیسڈ آپریشن پر سیکیورٹی فورسز کو خراجِ تحسین پیش کیا ہے۔
صدرِ مملکت نے اپنے بیان میں چار بھارتی حمایت یافتہ دہشت گردوں کے خاتمے کو قومی سلامتی کے لیے ایک اہم کامیابی قرار دیا ہے۔انہوں نے سیکیورٹی فورسز اور قانون نافذ کرنے والے اداروں کے عزم و استقلال کو سراہتے ہوئے کہا کہ قوم اپنے بہادر جوانوں کے ساتھ ہے۔
وزیرِ اعظم محمد شہباز شریف نے بھی قلات میں فتنۂ ہندوستان کے خلاف کامیاب آپریشن پر سیکیورٹی فورسز کے افسران و اہلکاروں کی تعریف کی ہے۔وزیرِ اعظم نے بھارتی پشت پناہی میں سرگرم چار دہشت گردوں کو جہنم واصل کرنے پر سیکیورٹی فورسز کی پیشہ ورانہ صلاحیتوں اور بہادری کو سراہا۔وزیرِ اعظم نے کہا کہ دہشت گردی کی عفریت کے مکمل خاتمے تک یہ جنگ جاری رہے گی۔