اسلام آباد : اسرائیلی جارحیت کے خلاف قطر سے اظہار یکجہتی ، وزیراعظم شہباز شریف اپنی کابینہ کے اہم وزرا کے ہمراہ قطر روانہ ہوگئے۔
اسرائیل نے9 ستمبر کو دوحہ میں حماس قیادت کو نشانہ بنایا تھا، جس کی پاکستان اور سعودی عرب سمیت عالمی سطح پر شدید مذمت کی گئی۔
حماس کے مطابق اس حملے میں ان کے پانچ ارکان قتل کیے گئے، جن میں غزہ کے جلاوطن رہنما خلیل الحیہ کے صاحبزادے بھی شامل ہیں۔وزیراعظم کے دفتر سے جاری بیان کے مطابق شہباز شریف قطر پر اسرائیلی جارحیت کے تناظر میں شیخ تمیم بن حمد آل ثانی، قطری شاہی خاندان اور قطری عوام سے یکجہتی کے لیے یہ دورہ کر رہے ہیں۔
نائب وزیراعظم و وزیرخارجہ محمد اسحاق ڈار، وزیر دفاع خواجہ محمد آصف اور وزیر اطلاعات عطا اللہ تارڑ بھی وزیراعظم کے ہمراہ ہیں۔
وزیراعظم کے دفتر سے جاری بیان میں کہا گیا کہ قطر اور پاکستان کے مابین دیرینہ تاریخی برادرانہ تعلقات ہیں، جو مشترکہ عقیدے اور اقدار پر مبنی ہیں۔
پاکستان نے قطر کا ہمیشہ ہر مشکل وقت میں ساتھ دیا اور دیتا رہے گا، اس کا اظہار وزیراعظم قطری امیر سے ملاقات میں کریں گے۔ ملاقات میں اسرائیل کے خطے کے مختلف ممالک پر بلاجواز حملوں اور مسلسل جارحیت کے ساتھ ساتھ خطے میں امن کے قیام کے لیے مشاورت ہوگی۔
دفتر خارجہ سے جاری ایک بیان میں کہا گیا کہ یہ دورہ قطر کی سلامتی اور خودمختاری کے لیے پاکستان کی غیر متزلزل حمایت اور مشرق وسطیٰ میں امن و استحکام کے عزم کو اجاگر کرتا ہے۔