ملتان : ( حافظ نعیم /خصوصی رپورٹر )وزیراعلیٰ پنجاب مریم نواز شریف نے ملتان ہیڈ محمد والا بریچنگ پوائنٹ کا دورہ کیا اور سیلاب کی صورتحال کا جائزہ لیا۔ ملتان شہرکو بچانے پر ارکان پارلیمنٹ نے وزیراعلیٰ مریم نواز شریف کو خراج تحسین پیش کیا۔ وزیراعلیٰ مریم نواز شریف نے سیلابی ریلے میں پھنسے ہوئے خاندان کو کنارے سے خود ریسیو کیا۔
ریسیکیو1122کی ٹیم دریائی بیلے میں پھنسے خاندان اور ان کے مال مویشیوں کو نکال کر باہر لائی۔ وزیراعلیٰ مریم نواز شریف سے متاثرہ خاندانوں نے اظہار تشکر کیا اور جان بچ جانے پر اللہ تعالیٰ کا شکر ادا کیا۔ متاثرہ بزرگ خاتون نے وزیراعلیٰ مریم نواز شریف سے گفتگو کرتے ہوئے کہا کہ ”تساں دے مہربانی ایں، ساڈا ہال گہنن اے گئے ہو“۔
وزیراعلیٰ مریم نواز شریف نے متاثرہ خاندان سے کہا کہ میں سیلاب میں پھنسے اپنے بہن بھائیوں کا دکھ درد بانٹنے آئی ہوں۔ مجھے خوشی ہے کہ آپ اور آپ کے مال مویشی خیریت سے باہر آگئے۔وزیراعلیٰ مریم نواز شریف نے تھرمل امیجنگ ڈرون کی مدد سے متاثرین کی نشاندہی کے عمل کا بھی مشاہدہ کیا۔ تھرمل امیجنگ کیمرہ آٹھ کلو میٹر تک مسلسل 45 منٹ تک پرواز کر سکتا ہے۔ وزیراعلیٰ مریم نواز شریف نے پی ڈی ایم اے کی ڈیزاسٹر وین میں بیٹھ کرسیلابی صورتحال کا لائیو مشاہدہ کیا۔ وزیراعلیٰ مریم نواز شریف نے پی ڈی ایم اے کو مزید ڈیزاسٹر وین مہیا کرنے کی ہدایت کی۔
کمشنر ملتان عامر کریم خاں اور ڈپٹی کمشنر وسیم سندھو نے وزیراعلیٰ مریم نواز شریف کو تازہ ترین صورتحال کے بارے میں بریفنگ دی۔ بریفنگ میں بتایا گیا کہ ضلع ملتان تقریباً 150فٹ طویل ایریا براہ راست سیلابی پانی سے متاثرہورہا ہے۔ ملتان کے علاقے میں سیلابی ریلوں سے 138 موضع متاثر ہوئے۔ ملتان میں تین لاکھ 64ہزار افراد متاثر ہوئے۔بریفنگ میں مزید بتایا گیا کہ سیلابی ریلے میں پھنسے ایک لاکھ 20ہزار سے زائد مویشیوں کو بحفاظت ریسکیو کیا۔ ملتان میں سیلاب متاثرین کے لئے 25فلڈ ریلیف کیمپ میں 7862متاثرین مقیم ہیں۔فلڈ ریلیف کیمپوں میں صبح، دوپہر اور شام کا کھانا دیا جاتا ہے، 24 گھنٹے ڈاکٹر اور طبی عملہ موجود رہتا ہے۔ وزیراعلیٰ مریم نواز شریف نے فلڈ ریلیف کیمپوں میں مچھر مار اور جراثیم کش ادویات کے سپرے کے بارے میں بھی دریافت کیا۔ وزیراعلیٰ مریم نواز شریف نے فلڈ ریلیف کیمپ میں مقیم بچوں کی دودھ اور دیگر ضروریات پوری کرنے کی بھی ہدایت کی۔