تحریر:رانا افضل رزاق ایڈووکیٹ
جہاں لفظ بے نقاب ہوں۔۔۔ وہیں سے سچ کا آغاز ہوتاہے
باسربراہی چیف جسٹس صاحبہ لاہور ہائی کورٹ کے لارجر بینچ نے پراپرٹی اونر شپ قانون کے تحت انتظامی کمیٹیوں کے اختیارات محدود کرتے ہوئے واضح کیا کہ فریقین کو سنے بغیر قبضہ دلانے یا واگزار کرنے کے تمام احکامات کالعدم قرار دیتے ہوئے مقدمات کو ضلعی ٹربیونلز کو منتقل کرنے کا احکامات صادر فرمائے اور انہیں ہدایت دی کہ شواہد، دلائل اور جرح کے بعد باقاعدہ عدالتی فیصلہ کریں۔ اس فیصلے میں بنیادی آئینی اصول حقِ سماعت اور منصفانہ ٹرائل کو فوقیت دی گئی ہے۔
یہ فیصلہ درحقیقت شہری ملکیتی حقوق کے تحفظ اور شفاف عدالتی کارروائی کے لیے ایک مثبت سنگِ میل ہے۔
تاہم اگر انتظامیہ جان بوجھ کر اس فیصلے کی عملداری سے انکار کرے تو آئینی پامالی اور شہری حقوق کی خلاف ورزی ہوگی۔ عدالتی اعتماد میں کمی اور شہریوں میں فوری انصاف پر شبہات پیدا ہوں گے۔ جس پر عدالت Contempt of Court کے تحت سخت قانونی کارروائی کر سکتی ہے۔
یہ صورتحال واضح کرتی ہے کہ فیصلے کا مثبت اثر صرف اور صرف اس کی موثر عملداری سے ممکن ہے۔
لاہور ہائی کورٹ کے لارجر بینچ کا یہ فیصلہ شہری ملکیتی حقوق کے تحفظ، انتظامی اختیارات کی حد بندی، اور شفاف عدالتی عمل کے لیے ایک مضبوط نظیر ہے، مگر اس کے حقیقی اثر کے لیے انتظامیہ کی مکمل قانونی پابندی ضروری ہے۔