لاہور:(خصوصی رپورٹ ) این اے 129 کے ضمنی الیکشن کے معاملے پر مسلم لیگ ن شدید دھڑے بندی کا شکارہوگئی جس کاسربراہ مسلم لیگ ن نوازشریف نے نوٹس لے لیا ۔
پارٹی ذرائع کے مطابق سربراہ مسلم لیگ ن نوازشریف نے دھڑے بندیوں کا نوٹس لیتے ہوئےراشد نصراللہ کوتمام سیاسی دھڑوں کو متحد کرنے کا ٹاسک دیدیا۔
اہم پارٹی رہنماکے مطابق دھڑے بندی ضمنی الیکشن کے نتائج پر شدید اثر انداز ہوسکتی ہے،این اے 129 میں مسلم لیگ ن مجموعی طورپر چار دھڑوں میں تقسیم ہے جبکہ تمام دھڑے ایک دوسرے کے آمنے سامنے ہیں،این اے 129 میں لیگی امیدوار حافظ میاں محمد نعمان ،رانا مشہود احمد خان ،مہر اشتیاق احمد اور چودھری باقر حسین کی سرپرستی میں چار دھڑے موجود ہیں جس سے پارٹی کو نقصان ہوگا۔
ذرائع کے مطابق راشد نصراللہ حلقہ این اے 129 میں سیاسی دھڑوں سے ملاقاتیں کریں گے اوران کے تحفظات کو دور کرکے این اے 129 کےلئے متحد کریں گے،راشد نصراللہ نے سابق ٹکٹ ہولڈر چودھری باقر حسین کے ڈیرے پر پارٹی ٹکٹ حافظ نعمان کے حوالے کیا۔