نئی دہلی :وفاقی وزیر ڈاکٹر مصدق ملک نے بھارتی دارالحکومت نئی دہلی میں شنگھائی تعاون تنظیم (ایس سی او) کے فورم سے خطاب کرتے ہوئے کہا ہے کہ تہذیبوں کے درمیان مکالمے کی اصل خوبصورتی مختلف آوازوں، ثقافتی شناختوں اور خیالات کے باہمی تبادلے میں پوشیدہ ہے، کیونکہ اگر سب کی آواز اور معنی ایک جیسے ہوں تو مکالمے کی ضرورت ہی باقی نہیں رہتی۔
انہوں نے کہا کہ مختلف رنگوں اور خوشبوؤں سے سجے گلدستے کی طرح معاشرے اور تہذیبیں بھی اپنے تنوع کی بدولت خوبصورت ہوتی ہیں، اور پاکستان کا تاریخی و تہذیبی ورثہ بھی گندھارا، وادی سندھ، وسطی ایشیا، افغانستان اور ایران سمیت مختلف خطوں کے اثرات کا مجموعہ ہے۔ وفاقی وزیر نے قدیم علم و دانش کے مرکز ٹیکسلا سمیت بخارا، سمرقند اور ایران کے ساتھ ادبی و شاعرانہ روابط کا حوالہ دیتے ہوئے واضح کیا کہ پاکستان کسی ایک تہذیب یا نسل کے واحد وارث ہونے کا دعویٰ نہیں کرتا بلکہ اس کی تاریخ مختلف تہذیبوں کے امتزاج سے تشکیل پائی ہے، اور یہ عظیم تاریخی ورثہ کسی ایک گروہ کی ملکیت نہیں بلکہ پوری انسانیت کا مشترکہ سرمایہ ہے جس کے دروازے سب کے لیے کھلے رہنے چاہییں۔
تہذیبوں کے درمیان مکالمے کی اصل خوبصورتی تنوع میں ہے، مصدق ملک وفاقی وزیر کا شنگھائی تعاون تنظیم کے فورم سے خطاب

