راولپنڈی :راولپنڈی میں حنا جاوید قتل کیس کی تحقیقات مکمل کرلی گئی ہیں اور پولیس نے مقدمے کا چالان تیار کرکے پراسیکیوشن برانچ کو بھجوا دیا ہے۔
پولیس کے مطابق کیس میں گھریلو ملازم ذیشان کو ملزم قرار دیا گیا ہے، جبکہ مقتولہ کے شوہر فیصل اصغر اور سسر کو بے گناہ قرار دے دیا گیا ہے۔
پولیس ذرائع کے مطابق تفتیش کے دوران حنا جاوید کے شوہر فیصل اصغر اور ان کے سسر کے خلاف شواہد سامنے نہ آنے پر انہیں مقدمے سے بری الذمہ قرار دیا گیا ہے، تاہم گھریلو ملازم ذیشان کو قتل کیس میں ملزم نامزد کیا گیا ہے۔
پولیس کے مطابق مقدمے میں دفعہ 376 بھی شامل کرلی گئی ہے، جس کا تعلق زیادتی کے جرم سے ہے۔ اس کے بعد تفتیشی کارروائی مکمل کرکے چالان پراسیکیوشن برانچ کو ارسال کردیا گیا ہے۔
چالان پراسیکیوشن برانچ کو موصول ہونے کے بعد اس کا قانونی جائزہ لیا جائے گا، جس کے بعد مقدمے کی مزید کارروائی متعلقہ عدالت میں آگے بڑھائی جا سکے گی۔
واضح رہے کہ حنا جاوید کے قتل کا مقدمہ اُن کے بھائی فہد جاوید کی مدعیت میں راولپنڈی کے تھانہ سول لائنز میں درج کیا گیا تھا اور اس میں حنا جاوید کے شوہر، سُسر اور ایک گھریلو ملازم کو نامزد کیا گیا تھا۔

