لکھنؤ: بھارتی ریاست اتر پردیش کے سینئر سیاستدان اور سماج وادی پارٹی کے رہنما اعظم خان نے جیل سے رہائی پاتے ہی مودی حکومت کے سامنے دو غیر معمولی مطالبات رکھ کر ریاستی و قومی سیاست میں ہلچل مچا دی ہے۔
میڈیا سے گفتگو کرتے ہوئے اعظم خان نے حکومت کو مخاطب کرتے ہوئے کہا کہ اگر کچھ لوگوں کو ان سے اس قدر نفرت ہے تو حکومت ان دو راستوں پر غور کرے: یا تو انہیں اور ان کے پورے خاندان کو رضاکارانہ موت (ایتھنیشیا) کی اجازت دی جائے، یا پھر وہ اپنا سب کچھ چھوڑنے کو تیار ہیں، انہیں ملک سے باہر جانے کی اجازت دی جائے۔
اپنی قید کے دوران پیش آنے والی مشکلات کا ذکر کرتے ہوئے اعظم خان کا کہنا تھا کہ انہیں اور ان کے خاندان کو بلاوجہ ہراساں کیا جا رہا ہے۔ انہوں نے بتایا کہ جیل میں سخت حالات کے باعث ان کا وزن 98 کلوگرام سے کم ہو کر 70 کلوگرام رہ گیا ہے اور انہوں نے انتہائی کٹھن وقت گزارا ہے، کیونکہ دنیا میں آزادی سے بڑی کوئی دولت نہیں۔
تعلیمی اداروں کے قیام کے حوالے سے اپنے مقدمات پر بات کرتے ہوئے انہوں نے کہا کہ اگر انہیں معلوم ہوتا کہ علم و تعلیم کی خدمت کرنے کا نتیجہ یہ نکلے گا اور انہیں جیل جانا پڑے گا، تو وہ اپنے بچوں کو جیل کی صعوبتیں سہتے دیکھنے کے بجائے خود رکشہ چلانے یا بچوں سے بیڑیاں بنوانے کو ترجیح دیتے۔
اعظم خان نے بھارتی تحقیقاتی ادارے انفورسمنٹ ڈائریکٹوریٹ (ای ڈی) کے طریقۂ کار پر بھی کڑی تنقید کی۔ ان کے بقول 31 اکتوبر کو جیسے ہی وہ جیل سے رہا ہوئے، ای ڈی نے انہیں فوری طور پر گرفتار کر لیا۔ انہوں نے الزام عائد کیا کہ ای ڈی نے عدالت میں جھوٹا حلف نامہ جمع کرا کر عدالت کو گمراہ کیا ہے، جس کے خلاف وہ عدالت میں باقاعدہ رٹ پٹیشن دائر کریں گے۔
بھارتی سیاست میں مذہب کے استعمال پر تنقید کرتے ہوئے اعظم خان نے کہا کہ اگر کوئی یہ سمجھتا ہے کہ تعلیم کا مندر تعمیر کرنے والے ایک مسلمان کو ہراساں کر کے وہ زیادہ ووٹ حاصل کر لے گا تو یہ اس کی غلط فہمی ہے۔ ان کا کہنا تھا کہ اب حالات بدل چکے ہیں اور مستقبل کے انتخابات ذات پات اور مذہب کے نام پر نہیں لڑے جائیں گے۔
’’پورے خاندان کو رضاکارانہ موت کی اجازت دی جائے یا پھر سب کچھ چھوڑ کر بھارت سے باہر جانے دیا جائے” سینئر بھارتی سیاستدان اعظم خان

