لاہور: وزیراعلیٰ پنجاب مریم نواز شریف سے ارکانِ صوبائی اسمبلی پیر محمد اشرف رسول اور خرم خان ورک نے ملاقات کی، جس میں صوبے کی عمومی سیاسی صورتحال، جاری ترقیاتی منصوبوں اور عوامی فلاح و بہبود کے سماجی پروگراموں پر تفصیلی تبادلۂ خیال کیا گیا۔
ملاقات کے دوران ارکانِ اسمبلی نے وزیراعلیٰ پنجاب کو ضلع شیخوپورہ کے عوامی مسائل اور بنیادی ضروریات سے آگاہ کیا۔ انہوں نے شیخوپورہ میں سڑکوں کی تعمیر و مرمت کے منصوبوں پر وزیراعلیٰ کا خصوصی شکریہ ادا کیا اور شہریوں کی جانب سے بیوٹیفکیشن پراجیکٹس پر ملنے والے پُرجوش اور مثبت ردعمل سے بھی آگاہ کیا۔
اس موقع پر گفتگو کرتے ہوئے وزیراعلیٰ پنجاب مریم نواز شریف نے کہا کہ پنجاب کے عوام کو علاج معالجے کی بہترین سہولیات ان کی دہلیز پر مہیا کرنا حکومت کا اولین عزم ہے۔ انہوں نے اس وژن کا اعادہ کیا کہ حکومت پنجاب صوبے کے ہر ضلع میں جدید کیتھ لیب، چلڈرن ہسپتال اور کینسر سینٹر قائم کرنا چاہتی ہے تاکہ مریضوں کو علاج کے لیے بڑے شہروں کا رخ نہ کرنا پڑے۔
وزیراعلیٰ نے مزید کہا کہ بیوٹیفکیشن پراجیکٹس کی تکمیل سے صوبے کے شہروں کی صورت بدل گئی ہے اور شہریوں کو ایک صاف ستھرا اور خوبصورت ماحول میسر آ رہا ہے۔ انہوں نے یقین دلایا کہ شیخوپورہ سمیت پنجاب بھر میں عوامی فلاح و ترقی کا یہ سفر مزید تیزی سے جاری رکھا جائے گا۔

