وزیراعظم محمد شہباز شریف نے جاتی امراء میں مسلم لیگ (ن) کے قائد میاں محمد نواز شریف سے ملاقات کی، جس میں ملکی مجموعی سیاسی صورتحال، معاشی استحکام اور قومی امور پر تفصیلی تبادلہ خیال کیا گیا۔
ملاقات کے دوران وزیراعظم نے قائد ن لیگ کو خیبر پختونخوا میں امن و امان کی موجودہ صورتحال اور صوبے کے عوام کی ترقی و خوشحالی کے لیے اٹھائے گئے حالیہ اقدامات پر اعتماد میں لیا۔ علاوہ ازیں وزیراعظم نے جاری حکومتی اصلاحات، بالخصوص معاشی بحالی اور ملک کو درپیش درپیش چیلنجز کے تدارک کے لیے کیے جانے والے اقدامات پر بریفنگ دی۔ اس اہم مشاورتی اجلاس میں نائب وزیراعظم و وزیر خارجہ سینیٹر اسحاق ڈار اور وزیراعلیٰ پنجاب مریم نواز شریف بھی موجود تھیں۔
