نوشہرو فیروز: اسکارپ کالونی میں مفت آنکھوں کا کیمپ، سینکڑوں مریضوں کا معائنہ اور ادویات تقسیم

بھریا سٹی (رپورٹ: مجاہد علی مغل)

سگا شاخ نوشہرو فیروز کے زیرِ اہتمام اسکارپ کالونی میں ایک روزہ مفت آنکھوں کا کیمپ لگایا گیا، جس میں سینکڑوں مردوں، خواتین اور معصوم بچوں کی آنکھوں کا تفصیلی معائنہ کیا گیا۔ کیمپ میں ماہر امراضِ چشم ڈاکٹر علی مصطفیٰ جوکھیو اور لیڈی ڈاکٹر فضا جاوید نے مریضوں کا معائنہ کیا۔

کیمپ کے دوران آنکھوں کی مختلف بیماریوں میں مبتلا سینکڑوں افراد کو مفت دوائیں بھی فراہم کی گئیں۔

اس موقع پر سگا شاخ نوشہرو فیروز کے صدر اعظم عالمانی، زاہد راجپر اور سید ظفر علی شاہ نے گفتگو کرتے ہوئے بتایا کہ یہ فلاحی پروگرام آرگنائزر جام جاوید علی انڑ اور ریاض حسین سابقی کے تعاون سے منعقد کیا گیا ہے۔ انہوں نے اعلان کیا کہ کیمپ کے دوران جن مریضوں کی آنکھوں میں موتیا یا کالا پانی (Glaucoma) کی تشخیص ہوئی ہے، ان کے آپریشنز بالکل مفت کیے جائیں گے۔ اس سلسلے میں حیدرآباد اور کراچی سے ماہر ڈاکٹروں اور لیڈی ڈاکٹروں کی ٹیم نوشہرو فیروز آئے گی جو یہ تمام آپریشنز مفت سر انجام دے گی۔

کیمپ کے انتظامات سنبھالنے والے سگا شاخ کے عہدیداران صدر اعظم عالمانی، جنرل سیکریٹری زاہد راجپر، خزانچی سید ظفر علی شاہ، ایڈووکیٹ خالد تنیو اور معشوق چاچڑ نے اس عزم کا اظہار کیا کہ یہ کیمپ نوشہرو فیروز اور گردونواح کے دیہات کے ان غریب دیہاتیوں کے لیے لگایا گیا ہے جو مہنگے علاج اور ڈاکٹروں کی بھاری فیسیں برداشت کرنے کی سکت نہیں رکھتے۔ انہوں نے کہا کہ اس سہولت سے مستفیض ہو کر سینکڑوں شہریوں نے اپنی نظر کا معائنہ کروایا اور مفت ادویات حاصل کیں۔

آخر میں منتظمین نے بتایا کہ جن مریضوں کے آپریشنز طے شدہ ہیں، ان کے لیے بھی جلد سگا شاخ نوشہرو فیروز کی جانب سے ایک اور خصوصی کیمپ کا انعقاد کیا جائے گا۔