خوشاب (راجہ نورالٰہی عاطف سے)
گورنمنٹ ایلیمنٹری سکول ظفرآباد رنگپور بگھور کی والی بال ٹیم نے تحصیل لیول والی بال چیمپئن شپ میں شاندار کارکردگی کا مظاہرہ کرتے ہوئے فائنل میں گورنمنٹ ایلیمنٹری سکول ڈھمک کی ٹیم کو 31 کے مقابلے میں 14 پوائنٹس سے شکست دے کر چیمپئن شپ اپنے نام کر لی۔تفصیلات کے مطابق گورنمنٹ ایلیمنٹری سکول ظفرآباد رنگپور بگھور کی والی بال ٹیم نے اپنے اساتذہ ملک محمد خالد ندیم راہداری اور ملک بدر اقبال اعوان کی زیرِ نگرانی سپورٹس مقابلوں میں بھرپور تیاری اور ٹیم ورک کے ساتھ حصہ لیا۔ کھلاڑیوں نے بہترین کھیل، عمدہ مہارت اور مثالی جذبے کا مظاہرہ کرتے ہوئے فائنل میں کامیابی حاصل کرکے اپنے ادارے کا نام روشن کر دیا۔اس شاندار کامیابی پر عوامی، سماجی، تعلیمی، ادبی اور صحافتی حلقوں نے ہیڈ ماسٹر ملک عابد اقبال اعوان، کوچنگ و نگرانی کے فرائض انجام دینے والے اساتذہ اور ادارے کے جملہ سٹاف کو دلی مبارکباد پیش کی ہے۔ انہوں نے کہا کہ تعلیمی سرگرمیوں کے ساتھ ساتھ کھیلوں کے میدان میں بھی ادارے کی مسلسل کامیابیاں قابلِ تحسین ہیں۔