لکی مروت : خیبرپختونخوا کے ضلع لکی مروت میں پولیس نے بہادری اور بروقت کارروائی کی لازوال مثال قائم کرتے ہوئے دہشت گردی کا ایک بہت بڑا اور ہولناک منصوبہ ناکام بنا دیا ہے۔
گنڈی چوک کے قریب پولیس اور فتنہ الخوارج کے کارندوں کے درمیان شدید فائرنگ کے تبادلے کے نتیجے میں خودکش بمبار سمیت 2 دہشت گرد موقع پر ہی ہلاک ہو گئے، جبکہ ایک زخمی خوارجی تاریکی کا فائدہ اٹھاتے ہوئے فرار ہونے میں کامیاب ہو گیا جس کی گرفتاری کے لیے تعاقب جاری ہے۔
لکی مروت پولیس کی فوری کارروائی، خودکش بمبار سمیت فتنہ الخوارج کے دو کارندے ہلاک، ایک زخمی.
خودکش بمبار بڑی دہشتگردانہ کارروائی کرنے جا رہے تھے جسے ناکام بنایا گیا.
دہشت گردوں سے اسلحہ ایمونیشن، کالعدم تنظیم کے جھنڈے و دیگر ممنوعہ سامان برآمد https://t.co/aV1Wq2hIID
— KP Police (@KP_Police1) November 4, 2026
پولیس ترجمان کی جانب سے جاری کردہ تفصیلات کے مطابق لکی مروت کے حساس علاقے گنڈی چوک میں کالے شیشوں والی ایک انتہائی مشکوک موٹر کار کی موجودگی کی خفیہ اطلاع ملی تھی۔
اطلاع ملتے ہی پولیس کی نڈر اور چاق و چوبند نفری فوری طور پر موقع پر پہنچ گئی۔ پولیس کی گاڑی دیکھتے ہی کار میں سوار مشتبہ خوارجیوں نے خوف کے عالم میں فرار ہونے کی کوشش کی اور پولیس اہلکاروں پر اندھا دھند فائرنگ کھول دی۔ پولیس جوانوں نے فوری طور پر حکمتِ عملی کے تحت پوزیشنیں سنبھالیں اور جوابی فائرنگ کی۔
طرفین کے درمیان کچھ دیر تک جاری رہنے والے اس شدید فائرنگ کے تبادلے میں گاڑی میں سوار ایک خودکش بمبار اور اس کا ساتھی موقع پر ہی ڈھیر ہو گئے۔
فائرنگ کے دوران ایک اور دہشت گرد شدید زخمی ہوا جو موقع سے بھاگ نکلنے میں کامیاب ہو گیا، جس کی تلاش کے لیے گرد و نواح کی ناکہ بندی کر دی گئی ہے۔
واقعے کے فوری بعد پولیس نے دہشت گردوں کی تباہ شدہ گاڑی کی باریک بینی سے تلاشی لی تو اس کے اندر سے بھاری مقدار میں جدید ترین اسلحہ، ایمونیشن، کالعدم تحریک طالبان پاکستان (TTP) کا جھنڈا، بھیس بدلنے کے لیے استعمال ہونے والے خواتین کے برقعے اور دیگر مشکوک سامان برآمد ہوا۔