پشاور/مہمند
خیبرپختونخوا کے ضلع مہمند میں انسداد پولیو مہم کی سیکیورٹی پر مامور پولیس اہلکاروں پر نامعلوم مسلح افراد کی فائرنگ کے نتیجے میں دو پولیس اہلکار شہید جبکہ ایک زخمی ہو گیا ہے۔
پولیس ذرائع کے مطابق یہ لرزہ خیز واقعہ ضلع مہمند کی تحصیل پنڈیالی کے علاقے ڈاگ تمانزئی میں پیش آیا۔ پولیو مہم کے دوران سیکیورٹی کے لیے روانہ ہونے والی پولیس ٹیم کو راستے میں نامعلوم مسلح ملزمان نے اندھا دھند فائرنگ کا نشانہ بنایا۔
فائرنگ کے استیج پر ہی سپاہی ظہور اور سپاہی فضل جامِ شہادت نوش کر گئے، جبکہ فائرنگ کی زد میں آنے والے ایک اور اہلکار سپاہی صابر شدید زخمی ہوگئے۔ واقعہ کی اطلاع ملتے ہی ریسکیو ٹیمیں اور پولیس کی بھاری نفری فوری طور پر جائے وقوعہ پر پہنچی اور زخمی اہلکار کو طبی امداد کے لیے قریبی اسپتال منتقل کر دیا۔
واقعہ کے فورا بعد سیکیورٹی فورسز اور پولیس نے ملزمان کی گرفتاری کے لیے علاقے کی ناکہ بندی کر کے سرچ آپریشن شروع کر دیا ہے۔ اس افسوسناک واقعے کے بعد علاقے میں سوگوار فضا ہے جبکہ سیاسی و سماجی حلقوں کی جانب سے اس بزدلانہ کارروائی کی شدید مذمت کی گئی ہے۔