اسلام آباد: زرعی معیشت کے لیے ایک انتہائی خوش آئند اور بڑی کامیابی سامنے آئی ہے، جہاں پاکستان نے روایتی حریف ویتنام کو پیچھے چھوڑتے ہوئے عالمی سطح پر چاول کی برآمدات میں تیسری پوزیشن حاصل کر لی ہے۔
حالیہ تجارتی اعداد و شمار کے مطابق، ماہِ ستمبر میں پاکستانی چاول کی برآمدات شاندار کارکردگی کا مظاہرہ کرتے ہوئے 4 لاکھ 20 ہزار ٹن تک پہنچ گئیں، جبکہ اس کے مقابلے میں ویتنام کی برآمدات 3 لاکھ 37 ہزار ٹن تک محدود رہیں۔
عالمی منڈی میں پاکستانی چاول کی مانگ کے ساتھ ساتھ اس کی قدر میں بھی نمایاں اضافہ دیکھا گیا ہے۔ اعداد و شمار کے مطابق، پاکستانی چاول کی اوسط برآمدی قیمت 621 ڈالر فی ٹن ریکارڈ کی گئی، جو کہ ویتنام (563 ڈالر فی ٹن) کے مقابلے میں نمایاں طور پر زیادہ ہے۔
ماہرین کا کہنا ہے کہ خلیجی خطے کے چیلنجز اور بین الاقوامی بحری راستوں میں درپیش رکاوٹوں کے باوجود، جاری مالی سال کی پہلی سہ ماہی میں پاکستانی چاول کی برآمدات کے حجم میں 51 فیصد اور زرمبادلہ کی آمدنی میں 37 فیصد کا شاندار اضافہ ریکارڈ کیا گیا ہے۔
کاشت کے رقبے میں بہتری، بہتر فصل کی پیداوار اور بروقت حکومتی و ادارہ جاتی معاونت اس کامیابی کے اہم محرکات ہیں، جو ملک کے زر مبادلہ کے ذخائر کو مستحکم کرنے میں اہم کردار ادا کر رہے ہیں۔