لاہور کے مصروف علاقے گلبرگ انڈسٹریل ایریا میں ایک نجی بیکری کے کارخانے میں گیس سلنڈر کا زور دار دھماکا ہوا ہے، جس کے نتیجے میں ایک شخص جاں بحق جبکہ 8 افراد شدید زخمی ہو گئے ہیں۔ریسکیو حکام کے مطابق دھماکا کارخانے کی پہلی منزل پر ہوا، جہاں واقعے کے وقت 40 سے زائد افراد موجود اور برسرِ روزگار تھے۔ دھماکے کی آواز اتنی شدید تھی کہ دور دور تک سنی گئی، جس سے علاقے میں شدید خوف و ہراس پھیل گیا۔اطلاع ملتے ہی ریسکیو 1122، پولیس اور دیگر امدادی ٹیمیں فوری طور پر جائے وقوعہ پر پہنچ گئیں اور امدادی کارروائیاں شروع کر دیں۔ ریسکیو ذرائع کے مطابق جاں بحق ہونے والے شخص کی شناخت ساجد کے نام سے ہوئی ہے۔زخمی ہونے والے افراد کو فوری طور پر قریبی اسپتال منتقل کر دیا گیا ہے، جہاں انہیں طبی امداد فراہم کی جا رہی ہے۔ اسپتال ذرائع کے مطابق زخمیوں میں سلیم، حنیف، نواز، منیر اور اشتیاق بھی شامل ہیں، جبکہ چند زخمیوں کی حالت تشویشناک بتائی جا رہی ہے جس سے ہلاکتوں میں اضافے کا خدشہ بھی ظاہر کیا جا رہا ہے۔پولیس اور قانون نافذ کرنے والے اداروں نے علاقے کو گھیرے میں لے کر واقعے کی تفصیلی تحقیقات کا آغاز کر دیا ہے تاکہ حادثے کی اصل وجوہات کا تعین کیا جا سکے۔ ابتدائی طور پر حادثہ گیس سلنڈر پھٹنے کے باعث پیش آیا بتایا جاتا ہے۔