نوشہرہ (انورزیب خان بیورو رپورٹ)
جمعیت علماء اسلام کے امیر اور پی ڈی ایم کے سربراہ مولانا فضل الرحمٰن نے اکوڑہ خٹک کا دورہ کیا۔ اس موقع پر انہوں نے شیخ الحدیث مولانا عبد الحق رحمۃ اللہ علیہ کے فرزند اور شہید مولانا سمیع الحق رحمۃ اللہ علیہ کے بھائی پروفیسر ڈاکٹر محمود الحق کی وفات پر شیخ الحدیث مولانا انوار الحق اور خانوادۂ حقانیہ سے گہرے دکھ اور تعزیت کا اظہار کیا۔ انہوں نے مرحوم کے درجات کی بلندی اور ایصالِ ثواب کے لیے فاتحہ خوانی کی۔بعد ازاں، مولانا فضل الرحمٰن نے اپنے محترم اساتذہ حضرت دیر باباجی اور حضرت مغفوراللہ باباجی کی رہائش گاہ پر حاضری دی، ان کی خیریت دریافت کی اور ان سے ملاقات کی۔اس دورے کے دوران جمعیت علماء اسلام کے صوبائی جنرل سیکرٹری سینیٹر مولانا عطاء الحق درویش سمیت دیگر صوبائی اور ضلعی قائدین بھی ان کے ہمراہ تھے۔