سامارو (رپورٹ بیوروچیف ڈاکٹر ایم لال واگھانی)
سامارو میں پولیو کے خاتمے کے حوالے سے عوامی شعور اجاگر کرنے اور بچوں کو پولیو سے محفوظ بنانے کے لیے روٹری کلب سامارو کی جانب سے گورنمنٹ بوائز ہائر سیکنڈری اسکول سے ایک شاندار ریلی نکالی گئی، جس میں روٹری کلب سندھ و بلوچستان کے گورنر شکیل احمد قائمخانی، اسسٹنٹ کمشنر سامارو سنجے کمار ترکیو، روٹری کلب کے بڑی تعداد میں ارکان، اسکول کے طلبہ اور شہریوں نے شرکت کی۔ریلی کے دوران شرکا نے پولیو کے مکمل خاتمے، بچوں کو پولیو کے قطرے پلانے اور صحت مند مستقبل کا پیغام عام کیا۔اس موقع پر روٹری کلب سندھ و بلوچستان کے گورنر شکیل احمد قائمخانی اور اسسٹنٹ کمشنر سامارو سنجے کمار ترکیو نے کہا کہ ملک میں پولیو کے خاتمے کے لیے اہم پیش رفت ہوئی ہے، تاہم پاکستان سے پولیو کا مکمل خاتمہ یقینی بنانے کے لیے مشترکہ کوششیں جاری رکھنا ضروری ہے۔انہوں نے والدین سے اپیل کی کہ وہ ہر پولیو مہم کے دوران مقررہ وقت پر اپنے بچوں کو پولیو کے قطرے ضرور پلائیں تاکہ انہیں اس موذی مرض سے محفوظ بنایا جا سکے۔ انہوں نے کہا کہ پولیو کے مکمل خاتمے کے لیے والدین، محکمہ صحت، سماجی تنظیموں اور عوام کو اپنا بھرپور کردار ادا کرنا ہوگا۔ریلی میں رمیش مالہی، ایڈووکیٹ ممتاز کالرو، رمیش کمار، تنویر راجپوت، ڈاکٹر ثناء اللہ آرائیں، راشد آرائیں سمیت روٹری کلب کے ارکان، اساتذہ، طلبہ اور شہریوں نے بڑی تعداد میں شرکت کی۔ریلی کا مقصد عوام میں پولیو کے حوالے سے شعور اجاگر کرنا اور ہر بچے کو پولیو سے محفوظ بنانے کی اہمیت کو اجاگر کرنا تھا۔