نواب شاہ (بیورو رپورٹ: نفیس آرائیں)
خیرپور کے رہائشی غلام مرتضیٰ سولنگی نے الزام عائد کیا ہے کہ تیسری شادی کرنے کے بعد ان کے بھائیوں اور دیگر رشتہ داروں کے ساتھ تنازع شدت اختیار کر گیا ہے، جس کے نتیجے میں انہیں مبینہ تشدد، زنجیروں میں باندھنے اور دھمکیوں کا سامنا ہے۔ انہوں نے اعلیٰ پولیس حکام سے فوری نوٹس لیتے ہوئے تحفظ فراہم کرنے اور معاملے کی غیر جانبدارانہ تحقیقات کرانے کی اپیل کی ہے۔نواب شاہ پریس کلب میں پریس کانفرنس کرتے ہوئے غلام مرتضیٰ سولنگی کا کہنا تھا کہ وہ گزشتہ ڈیڑھ سال سے خاندانی تنازع کا شکار ہیں۔ انہوں نے الزام عائد کیا کہ مخالفین نے انہیں مبینہ طور پر تشدد کا نشانہ بنایا، زنجیروں میں باندھا اور مرغ بنا کر سزائیں دیں، جبکہ بھائی کی شادی کے موقع پر بھی ان کے ساتھ مارپیٹ کی گئی۔متاثرہ شہری نے دعویٰ کیا کہ گزشتہ روز نامزد ملزمان افضل، طارق، یارو اور ارباب سولنگی نے انہیں مبینہ طور پر شدید تشدد کا نشانہ بنایا، جس سے ان کی پشت پر چوٹوں کے نشانات موجود ہیں اور اس واقعے کے چشم دید گواہ بھی موجود ہیں۔غلام مرتضیٰ سولنگی نے مزید بتایا کہ مخالف فریق کی جانب سے ان سے پانچ لاکھ روپے طلب کیے جا رہے ہیں اور رقم نہ دینے کی صورت میں جھوٹے مقدمات میں پھنسانے کی دھمکیاں دی جا رہی ہیں۔ انہوں نے کہا کہ وہ ایک غریب آدمی ہیں اور اتنی بڑی رقم ادا کرنے کی استطاعت نہیں رکھتے۔متاثرہ شہری نے ایس پی نواب شاہ اور دیگر متعلقہ پولیس حکام سے پرزور اپیل کی ہے کہ ان کی شکایت کا فوری نوٹس لے کر شفاف تحقیقات کرائی جائیں، گواہوں کے بیانات قلمبند کیے جائیں اور انہیں جان و مال کا تحفظ فراہم کیا جائے۔ ان کا کہنا تھا کہ وہ قانون کے مطابق کارروائی چاہتے ہیں اور اگر انہیں انصاف نہ ملا تو وہ عدالت سے رجوع کرنے کا حق محفوظ رکھتے ہیں۔واضح رہے کہ اس واقعے کے حوالے سے نامزد افراد کا مؤقف تحال سامنے نہیں آ سکا ہے، جبکہ لگائے گئے الزامات کی آزادانہ تصدیق ہونا باقی ہے۔