نوشہرہ انورزیب خان سے
ضلع نوشہرہ میں پولیس نے جرائم پیشہ عناصر کے خلاف گھیرا تنگ کرتے ہوئے اہم اور کامیاب کارروائیاں انجام دی ہیں۔ ایک کارروائی کے دوران مسلح راہزنی میں ملوث ڈکیت گروہ کے سرغنہ کو گرفتار کر کے مسروقہ رقم برآمد کر لی گئی ہے جبکہ دوسری کارروائی میں قتل کے مقدمہ میں نامزد ملزم کو بھی دبوچ لیا گیا۔ضلعی پولیس سربراہ (DPO) سونیا شمروز خان کی ہدایت اور ایس ڈی پی او اکوڑہ خٹک سرکل گلشید خان کی براہِ راست نگرانی میں، ایس ایچ او تھانہ نظام پور کاشف خان اور تفتیشی آفیسر نعیم خان پر مشتمل پولیس ٹیم تشکیل دی گئی تھی، جسے راہزنی میں ملوث ملزمان کی فوری گرفتاری اور مسروقہ مال کی برآمدگی کا ٹاسک سونپا گیا تھا۔پولیس ٹیم نے پیشہ ورانہ مہارت اور جدید تفتیشی خطوط پر کام کرتے ہوئے تمام شواہد اکٹھے کیے اور ٹھوس معلومات کی بنیاد پر راہزن گروہ کے سرغنہ تک کامیاب رسائی حاصل کی۔ کارروائی کے دوران گروہ کے سرغنہ حضرت عمر ولد قیمت گل سکنہ اسوخیل نظام پور کو حراست میں لے لیا گیا۔ ملزم نے دورانِ تفتیش اپنے جرم کا اعتراف کیا، جس کی نشاندہی پر موٹرسائیکل فروخت کرنے سے حاصل ہونے والی 90 ہزار روپے نقد رقم بھی برآمد کر لی گئی ہے۔ پولیس کے مطابق ملزم کے دیگر ساتھیوں کے نام تفتیشی مفاد کے پیشِ نظر صیغۂ راز میں رکھے گئے ہیں، جن کی گرفتاری کے لیے چھاپے مارے جا رہے ہیں اور جلد ان کی گرفتاری بھی متوقع ہے۔
اسی طرح تھانہ نظام پور پولیس نے ایک اور کارروائی کے دوران مقدمہ نمبر 569 مورخہ 29 ستمبر 2026ء (جرم دفعہ 302، 324، 34) میں نامزد ملزم آفتاب ولد محمد علی سکنہ جبئی کو بھی حسب ضابطہ گرفتار کر لیا ہے۔ پولیس کی جانب سے دونوں مقدمات میں مزید تفتیش جاری ہے۔