نئی دہلی :انڈیا کی کاکروچ جنتا پارٹی کے بانی، ابھیجیت دیپکے کو دارالحکومت دہلی کے مرکزی علاقے میں مارچ سے قبل حراست میں لے لیا گیا ہے۔
ان کی حراست ایسے وقت میں عمل میں آئی ہے جب پولیس نے جمعے کے مارچ کے انعقاد کے خلاف انتباہ جاری کیا تھا اور اجتماع کو روکنے کے لیے شہر بھر میں ہزاروں اہلکار تعینات کیے گئے تھے۔
دیپکے کی نوجوانوں کی قیادت میں قائم کاکروچ جنتا پارٹی (سی جے پی) انڈیا کے چیف الیکشن کمشنر کے استعفے کا مطالبہ کر رہی ہے۔ پارٹی کا الزام ہے کہ ووٹر فہرستوں میں ردوبدل کیا گیا ہے۔ الیکشن کمیشن اس الزام کی تردید کرتا ہے۔
گروپ نے اپنے حامیوں سے کہا تھا کہ وہ دہلی کے مصروف ترین تجارتی علاقوں میں سے ایک، کناٹ پلیس کے ایک پارک میں جمع ہوں اور انڈیا کا پرچم لہرائیں۔
شرکا کی تعداد سی جے پی کے پہلے مظاہروں کے مقابلے میں کم تھی، اگرچہ ہجوم میں بتدریج اضافہ ہوتا دکھائی دے رہا تھا۔ بی بی سی نے دیکھا کہ بعض نوجوان مظاہرین کو حراست میں لے کر ایک بس میں دھکیلا جا رہا تھا جہاں پہلے ہی کچھ خواتین زیرِ حراست موجود تھیں۔ بس میں تقریباً 50 خواتین پولیس اہلکار موجود تھیں، جن کی تعداد مظاہرین سے کہیں زیادہ تھی۔
دیپکے ابھی اپنے گھر سے نکلے تھے اور اپنی گاڑی تک پہنچنے ہی والے تھے کہ بی بی سی نے دیکھا پولیس افسران نے انھیں گھیر لیا اور زبردستی پولیس کی ایک گاڑی میں بٹھا لیا۔ سی جے پی کے بعض حامیوں نے گاڑی کو روانہ ہونے سے روکنے کی کوشش بھی کی۔
اپوزیشن سیاست دان انیش گاونڈے، جن کے گھر دیپکے قیام پذیر تھے، نے سوال اٹھایا کہ پولیس نے انھیں کیوں حراست میں لیا ہے۔ پولیس نے ابھی تک عوامی طور پر حراست کی وجہ کی تصدیق نہیں کی۔
گاونڈے نے کہا: ’قومی پرچم ہاتھ میں لے کر چلنے والے ایک اکیلے شخص کو حراست میں لینا کسی حد تک مضحکہ خیز بات ہے۔‘
ایک ہفتے سے بھی کم عرصے میں یہ دوسرا موقع تھا جب دیپکے کو حراست میں لیا گیا۔ گذشتہ سنیچر پولیس نے ان کا طیارہ دہلی پہنچنے کے فوراً بعد گھیر لیا تھا اور انھیں اُس منصوبہ بند احتجاج تک پہنچنے سے پہلے ہی اپنے ساتھ لے گئی تھی۔
