خیرپور (بیورو رپورٹ: نصیر لاشاری، )
سابق ریاست خیرپور کے آخری حکمران اور والی، ہز ہائینس میر علی مراد خان تالپور دوم 93 برس کی عمر میں انتقال کر گئے۔ ان کی وفات کی تصدیق ان کے صاحبزادے پرنس میر مہدی رضا نے کر دی ہے۔ذرائع کے مطابق میر علی مراد خان تالپور دوم گزشتہ کچھ عرصے سے ایس آئی یو ٹی (SIUT) اسپتال سکھر میں زیر علاج تھے۔ ان کے انتقال کی خبر پھیلتے ہی خیرپور اور کوٹ ڈیجی سمیت گرد و نواح میں غم کی فضا چھا گئی۔میر علی مراد خان تالپور دوم 1933 میں انگلینڈ میں پیدا ہوئے اور انہوں نے اپنی ابتدائی تعلیم بھی برطانیہ سے حاصل کی۔ وہ میر فیض محمد خان ثانی کے فرزند تھے اور ریاست خیرپور کی سہرابانی شاخ سے تعلق رکھتے تھے۔وہ کم عمری میں ریاست خیرپور کے حکمران بنے۔ پاکستان کے پہلے وزیراعظم لیاقت علی خان نے میر علی مراد خان تالپور کی دستار بندی کی تھی، جس کے بعد انہیں 17 توپوں کی سلامی دے کر مکمل حکومتی و انتظامی اختیارات تفویض کیے گئے۔ میر علی مراد خان تالپور 1947 سے 1954 تک ریاست کے والی رہے۔تالپور خاندان کے شاندار ماضی اور ان کی حکمرانی کی یادگاروں میں قلعہ کوٹ ڈیجی، فیض محل اور مہرانو کا جنگل آج بھی زندہ اور تاریخی نشانیوں کے طور پر موجود ہیں۔
