بیجنگ (سپورٹس ڈیسک): چائنا اوپن ٹینس ٹورنامنٹ کے سیمی فائنل کے دوران روس کے نامور ٹینس اسٹار ڈینیئل مدویدیف کو غصے میں گیند مار کر تماشائی کو زخمی کرنے پر میچ سے ڈس کوالیفائی کر دیا گیا۔ اس واقعے کے بعد ان کے حریف اور سربیا کے اسٹار کھلاڑی نوواک جوکووچ براہِ راست فائنل میں پہنچ گئے۔تفصیلات کے مطابق بیجنگ میں کھیلے جا رہے چائنا اوپن کے سیمی فائنل میں ڈینیئل مدویدیف اور نوواک جوکووچ کے درمیان سخت مقابلہ جاری تھا۔ میچ کے دوسرے سیٹ کے اہم موڑ پر، جب مدویدیف 5-7 اور 3-5 سے پیچھے تھے، ایک پوائنٹ ہارنے کے بعد انہوں نے غصے میں دیوار سے ٹکرا کر واپس آنے والی گیند کو ریکٹ سے زور دار ہٹ لگائی۔بدقسمتی سے گیند سیدھی سٹینڈز میں پہلے اسٹینڈ میں بیٹھے ایک تماشائی کی آنکھ پر جا لگی، جس سے وہ شخص درد سے کراہنے لگا اور سٹیڈیم کے میڈیکل سٹاف کو اسے طبی امداد کے لیے باہر لے جانا پڑا۔میچ کنٹرولر اور امپائر نے قوانین کی خلاف ورزی پر فوری ایکشن لیتے ہوئے روسی کھلاڑی کو میچ سے ڈس کوالیفائی قرار دے دیا۔واقعے کے بعد میڈیا سے گفتگو کرتے ہوئے ڈینیئل مدویدیف نے شدید افسوس کا اظہار کیا اور کہا کہ "میرا مقصد تماشائی کو نشانہ بنانا ہرگز نہیں تھا، گیند واپس آرہی تھی تو میں نے بس اسے ہٹ کیا، جو کہ میری بڑی غلطی ثابت ہوئی”۔دوسری جانب نوواک جوکووچ نے واقعے پر حیرت کا اظہار کرتے ہوئے متاثرہ شخص سے ہمدردی جتائی اور کہا کہ "مجھے مدویدیف کے لیے بھی افسوس ہے، میں خود 2020 میں اس طرح کی صورتحال کا سامنا کر چکا ہوں”۔
