سیالکوٹ (سلیم احمد اعوان شیخو)
ڈپٹی کمشنر سیالکوٹ محمد اویس مشتاق کی ہدایت اور نگرانی میں ضلع بھر میں صفائی کے خصوصی اقدامات تیزی سے جاری ہیں۔ اس سلسلے میں میونسپل کمیٹی ڈسکہ کی جانب سے شہر کی مرکزی شاہراہوں اور اہم مقامات پر خصوصی صفائی آپریشن کیا گیا، جس کے دوران 60 ٹن ویسٹ اٹھا کر 17 مقامات کو مکمل طور پر صاف کر دیا گیا۔صفائی آپریشن کے دوران سٹیڈیم روڈ، کالج روڈ، بینک روڈ اور سرکلر روڈ سمیت دیگر اہم شاہراہوں سے کچرا اٹھایا گیا۔ آپریشن میں میونسپل کمیٹی کے صفائی عملے کے ساتھ 6 ٹریکٹر ٹرالیوں نے حصہ لیا اور جمع شدہ ویسٹ کو بروقت منتقل کیا۔اسسٹنٹ کمشنر ڈسکہ سعدیہ جعفر نے موقع پر پہنچ کر صفائی آپریشن کا جائزہ لیا اور عملے کو ضروری ہدایات جاری کیں۔ انہوں نے تاکید کی کہ مرکزی شاہراہوں، بازاروں اور شہری آبادیوں میں صفائی کے عمل کو مؤثر بنایا جائے اور صفائی کے بعد ان مقامات کی مسلسل نگرانی بھی یقینی بنائی جائے۔ عوامی شکایات پر فوری کارروائی اور شہریوں کو صاف ستھرا ماحول فراہم کرنا انتظامیہ کی اولین ترجیح ہے۔ انہوں نے واضح کیا کہ صفائی کے مسائل کی نشاندہی پر متعلقہ ٹیموں کو فوری متحرک کیا جا رہا ہے اور ضلع بھر میں خصوصی صفائی آپریشن جاری رہے گا۔ضلعی انتظامیہ نے شہریوں سے اپیل کی ہے کہ وہ شہر کو صاف ستھرا رکھنے میں انتظامیہ کا ساتھ دیں، کچرا مقررہ مقامات پر تلف کریں اور مسائل کی بروقت نشاندہی کریں تاکہ مشترکہ کاوشوں سے "صاف ستھرا سیالکوٹ” یقینی بنایا جا سکے۔