دبئی (نیوز ڈیسک): انٹرنیشنل کرکٹ کونسل (آئی سی سی) کے تحت 2027 میں ہونے والے ون ڈے ورلڈکپ میں روایتی حریف پاکستان اور بھارت کو ایک بار پھر ایک ہی گروپ میں شامل کیے جانے کا قوی امکان ہے۔ذرائع کے مطابق جنوبی افریقہ، زمبابوے اور نمیبیا کی مشترکہ میزبانی میں منعقد ہونے والے اس ورلڈکپ میں کل 14 ٹیمیں حصہ لیں گی، جنہیں 7، 7 کے دو گروپس میں تقسیم کیا جائے گا۔ آئی سی سی کی تجارتی پالیسی، براڈکاسٹنگ ریونیو اور شائقینِ کرکٹ کی بے پناہ دلچسپی کو مدنظر رکھتے ہوئے دونوں روایتی حریفوں کو ایک ہی گروپ میں رکھنے کی تجویز پر پیش رفت کی جا رہی ہے تاکہ ابتدائی مرحلے میں ہی معرکہ ممکن ہو سکے۔ٹورنامنٹ کے نئے فارمیٹ کے تحت دونوں گروپس سے ٹاپ 3، 3 ٹیمیں ‘سپر سکس’ مرحلے میں کوالیفائی کریں گی۔ اس فارمیٹ کے باعث پاکستان اور بھارت کے درمیان ناصرف گروپ سٹیج بلکہ سپر سکس مرحلے اور ناک آٹ رانڈز میں بھی آمنے سامنے آنے کے امکانات موجود رہیں گے۔واضح رہے کہ آئی سی سی کے کسی بھی عالمی ٹورنامنٹ میں پاکستان اور بھارت کا میچ ریونیو اور ویورشپ کے لحاظ سے سب سے اہم سمجھا جاتا ہے، یہی وجہ ہے کہ گزشتہ کئی ایونٹس کی طرح ورلڈکپ 2027 میں بھی دونوں ٹیموں کو ایک ساتھ رکھنے کا قوی امکان ظاہر کیا جا رہا ہے۔
ورلڈکپ 2027: پاکستان اور بھارت کو پھر ایک ہی گروپ میں رکھنے کا امکان
