سری نگر: مقبوضہ جموں و کشمیر کے ضلع کٹھوعہ میں انڈین پیراملٹری فورس سینٹرل انڈسٹریل سکیورٹی فورس (سی آئی ایس ایف) کے ایک جوان نے فائرنگ کر کے اپنے ایک افسر اور دیگر تین ساتھیوں کو موت کے گھاٹ اُتار دیا۔
این ڈی ٹی وی کے مطابق یہ واقعہ جموں و کشمیر کے ضلع کٹھوعہ کے علاقے بسوہلی میں سیوا پاور پروجیکٹ کے مقام پر قائم سی آئی ایس ایف کے کیمپ میں پیش آیا۔اطلاعات کے مطابق سی آئی ایس ایف کے ایک اہلکار نے مبینہ طور پر کسی بحث و تکرار کے بعد غصے میں آکر اپنے ہی ساتھیوں پر فائرنگ کردی، جس کے نتیجے میں ایک افسر اور تین چار اہلکار ہلاک ہوگئے۔
یہ واقعہ منگل کو قریباً شام 6 بج کر 40 منٹ پر ماشکا گاؤں میں واقع سی آئی ایس ایف کے یونٹ میں پیش آیا۔
یہ یونٹ سیوا پاور پروجیکٹ میں تعینات تھا۔ سیوا پاور پروجیکٹ ایک ہائیڈروالیکٹرک پاور سٹیشن ہے جو سیوا دریا پر واقع ہے، اور یہ دریا دریائے راوی کی ایک معاون ندی ہے۔
ہلاک ہونے والوں میں اسسٹنٹ کمانڈنٹ انکت کمار پانڈے، سب انسپکٹر لکشمن سنگھ، کانسٹیبل رفیق احمد اور کانسٹیبل سندیپ کمار شامل ہیں۔
فائرنگ کرنے والے اہلکار کی شناخت ہیڈ کانسٹیبل اودیش کمار سنگھ کے طور پر ہوئی ہے۔ بتایا گیا ہے کہ اودیش کمار دفتر کے احاطے میں داخل ہوا اور اس نے اپنی سرکاری اے کے 47 رائفل سے ساتھیوں پر فائرنگ کردی۔
سی آئی ایس ایف کی جانب سے جاری بیان کے مطابق ’اودیش کمار کے پاس 150 گولیاں تھیں۔واقعے کے بعد اُن کی سرکاری رائفل قبضے میں لے لی گئی۔‘
چاروں زخمی اہلکاروں کو ہماچل پردیش کے این ایچ پی سی ہسپتال منتقل کیا گیا، جہاں وہ زخموں کی تاب نہ لاتے ہوئے دم توڑ گئے۔
فائرنگ کے بعد پولیس موقعے پر پہنچ گئی اور علاقے کو گھیرے میں لے لیا۔حکام نے اودیش کمار سنگھ کو گرفتار کرکے پولیس کے حوالے کر دیا۔
سینٹرل انڈسٹریل سکیورٹی فورس (سی آئی ایس ایف) کے حکام نے واقعے کی تحقیقات شروع کردی ہیں۔
