لاہور: مشیر وزیراعلیٰ پنجاب برائے اے آئی و خصوصی اقدامات علی ڈار نے اپنے صاحبزادے ابراہیم کے ہمراہ ’مریم نواز اسکول اینڈ ریسورس سینٹر برائے آٹزم‘ کا دورہ کیا، جہاں انہوں نے خصوصی بچوں سے ملاقات کی اور ان کی مختلف سرگرمیوں میں شرکت کی۔
دورے کے دوران علی ڈار نے آٹزم سینٹر میں فراہم کی جانے والی سہولیات کا تفصیلی جائزہ لیا۔ اس موقع پر گفتگو کرتے ہوئے ان کا کہنا تھا کہ مریم نواز اسکول اینڈ ریسورس سینٹر برائے آٹزم میں مہیا کی جانے والی سہولیات دنیا کے کسی بھی بہترین آٹزم مرکز سے کم نہیں ہیں۔ انہوں نے اسکول کے اساتذہ، انتظامیہ اور تمام عملے کی محنت، لگن اور پیشہ ورانہ کارکردگی کو بھرپور انداز میں سراہا۔
علی ڈار نے اس عزم کا اعادہ کیا کہ خصوصی بچوں کی تعلیم، بحالی اور ایک باوقار مستقبل کے لیے معیاری اداروں کا قیام وزیراعلیٰ پنجاب مریم نواز شریف کی اولین ترجیحات میں شامل ہے۔ انہوں نے کہا کہ خصوصی بچوں کو جدید تعلیم، بہترین تھراپی اور سازگار ماحول کی فراہمی معاشرے کی مشترکہ ذمہ داری ہے، اور آٹزم اسپیکٹرم پر موجود بچوں کے لیے انفرادی ضروریات کے مطابق تعلیم و تھراپی کے مؤثر نظام کو مزید فروغ دیا جائے گا۔
مشیر وزیراعلیٰ نے مزید کہا کہ خصوصی بچوں کی صلاحیتوں کو اجاگر کرنے اور انہیں معاشرے کا فعال حصہ بنانے کے لیے جدید ٹیکنالوجی سے بھی بھرپور استفادہ کیا جا رہا ہے۔ وزیراعلیٰ مریم نواز شریف کے وژن کے مطابق ہر بچے کو اپنی صلاحیتوں کے اظہار اور بہتر مستقبل کے مساوی مواقع فراہم کیے جا رہے ہیں۔
دورے کے دوران معاونِ خصوصی برائے اسپیشل ایجوکیشن محترمہ ثانیہ عاشق، سیکرٹری اسپیشل ایجوکیشن اور دیگر اعلیٰ حکام بھی ان کے ہمراہ موجود تھے، جنہوں نے ادارے کے امور اور بچوں کی فلاح و بہبود کے حوالے سے بریفنگ دی