عالمی یومِ جنگلات: وومن کالج خوشاب میں سیمینار، آگاہی واک اور پوسٹر سازی کے مقابلے

خوشاب (راجہ نورالہی عاطف سے)

گورنمنٹ ایسوسی ایٹ کالج برائے خواتین خوشاب میں عالمی یومِ جنگلات کی مناسبت سے شجرکاری مہم اور آگاہی تقریب کا باوقار انعقاد کیا گیا۔ اس موقع پر مضمون نویسی، پینٹنگ و پوسٹر سازی کے مقابلے، سیمینار اور آگاہی واک سمیت متعدد مثبت سرگرمیاں ترتیب دی گئیں۔

تقریب میں ڈپٹی ڈائریکٹر کالجز مسٹر امتیاز صبوحی نے بطور مہمانِ خصوصی شرکت کی اور کالج کے احاطے میں پودا لگا کر مہم کا باقاعدہ افتتاح کیا۔ ان کی نگرانی میں کالج کے وسیع احاطے میں 700 درخت اور پودے لگائے گئے۔ تقریب کے دوران طالبات نے ماحولیاتی آگاہی پر مبنی خوبصورت پوسٹرز اور بینرز آویزاں کیے اور تمام سرگرمیوں میں بھرپور جوش و خروش سے حصہ لیا۔

مہمانِ خصوصی امتیاز صبوحی نے طالبات سے خطاب میں شجرکاری کی اہمیت اور ماحولیاتی تحفظ میں درختوں کے کلیدی کردار پر روشنی ڈالتے ہوئے کہا کہ درخت ماحول کو خوشگوار بنانے کے ساتھ ساتھ صاف ہوا اور بہتر آب و ہوا کا ضامن ہیں۔ انہوں نے مزید کہا کہ اس مہم کا بنیادی مقصد کالج کو سرسبز و شاداب بنانا اور طالبات میں ماحولیاتی شعور بیدار کرنا ہے۔