دیر بالا(بیورو چیف ریاض ابوالخیل)
صاحب آباد میں آج سے شروع ہونے والے تبلیغی اجتماع کے موقع پر دیر بالا پولیس کی جانب سے سیکیورٹی کے خصوصی انتظامات کیے گئے ہیں۔ اجتماع کے روٹس اور شاہراہوں پر اضافی نفری کے ساتھ رائیڈر اسکواڈ بھی تعینات ہے، جبکہ ٹریفک کی روانی برقرار رکھنے کے لیے ٹریفک پولیس فیلڈ میں موجود ہے۔
ڈی پی او دیر بالا اسلم نواز نے اجتماع کے اطراف سیکیورٹی انتظامات کا جائزہ لیا اور تعینات افسران و جوانوں کو ضروری ہدایات جاری کیں۔ اس موقع پر ایس ڈی پی او سرکل واڑی فخر عالم خان، ڈسٹرکٹ کمانڈر ایلیٹ فورس خان ذادہ خان، ایس ایچ او تھانہ صاحب آباد سلمان ارشد خان اور انچارج ٹریفک دیر بالا بلال عنایت بھی موجود تھے۔
باہر سے آنے والے مہمانوں اور شہریوں کے تحفظ کے لیے دیر بالا پولیس ہمہ وقت مصروف عمل ہے۔
