اسلام آباد / راولپنڈی: پاکستان تحریک انصاف (پی ٹی آئی) کے ممکنہ لانگ مارچ اور احتجاجی مظاہروں کے پیشِ نظر جڑواں شہروں کی سیکیورٹی مزید سخت کر دی گئی ہے، جبکہ فیض آباد اور گردونواح کے علاقوں میں تمام ہوٹلز، گیسٹ ہاؤسز اور مسافر خانوں کو بند کرا دیا گیا ہے۔
ذرائع کے مطابق پولیس اور مقامی انتظامیہ کی جانب سے سیکیورٹی خدشات اور امن و امان کی صورت حال کو برقرار رکھنے کے لیے ہوٹل مالکان کو ہدایت کی گئی ہے کہ وہ کسی بھی غیر متعلقہ شخص یا احتجاج میں شرکت کے لیے آنے والے افراد کو رہائش فراہم نہ کریں۔
سیکیورٹی پلان کے تحت فیض آباد انٹرچینج، چُنگی نمبر 26، راوت اور دیگر اہم داخلاتی و خارجي راستوں پر پولیس اور قانون نافذ کرنے والے اداروں کی اضافی نفری تعینات کی جا رہی ہے۔ اس کے علاوہ حساس مقامات کی مانیٹرنگ کے لیے سیف سٹی کیمروں اور ڈرونز کا بھی استعمال کیا جا رہا ہے۔
انتظامیہ کا موقف ہے کہ یہ تمام اقدامات شہر میں امن و امان قائم رکھنے اور شہریوں کے جانی و مالی تحفظ کو یقینی بنانے کے لیے کیے جا رہے ہیں۔ دوسری جانب ہوٹل انتظامیہ اور تاجر برادری نے زبانی احکامات اور اچانک بندش سے کاروباری نقصان کا اندیشہ ظاہر کیا ہے۔