پاکستان دنیا اور دہشت گردی کے درمیان مضبوط دیوار ہے: وزیر داخلہ محسن نقوی اور امریکی سفیر نیٹلی بیکر کی اہم ملاقات،

اسلام آباد:وفاقی وزیر داخلہ محسن نقوی سے امریکی سفیر نیٹلی بیکر نے وزارتِ داخلہ میں ایک اہم ملاقات کی، جس میں پاک امریکہ تعلقات کے فروغ، سرمایہ کاری کے نئے مواقع اور دوطرفہ تعاون کو مزید مستحکم کرنے پر تفصیلی تبادلہ خیال کیا گیا۔ ملاقات کے دوران خطے کی تازہ ترین سیکیورٹی صورتحال، امن و استحکام کی مشترکہ کاوشوں اور دیگر باہمی دلچسپی کے امور پر بھی گفتگو کی گئی۔
ملاقات میں دونوں جانب سے اس بات پر اتفاق کیا گیا کہ مختلف شعبوں میں باہمی رابطوں کو مزید بڑھایا جائے گا۔ اس موقع پر امریکی سفیر نیٹلی بیکر نے دہشت گردی کے خلاف جنگ میں پاکستان کی لازوال قربانیوں اور عزم کو بھرپور انداز میں سراہا۔
وفاقی وزیر داخلہ محسن نقوی نے دوٹوک مؤقف اختیار کرتے ہوئے کہا کہ "پاکستان دنیا اور دہشت گردی کے درمیان ایک مضبوط دیوار کا کردار ادا کر رہا ہے۔” انہوں نے اس عزم کا اعادہ کیا کہ پاکستان خطے سے دہشت گردی کے مکمل خاتمے اور پائیدار امن کے قیام کے لیے عالمی برادری کے ساتھ مل کر کام کرنے کے لیے پرعزم ہے۔