لاہور: کاؤنٹر ٹیررازم ڈیپارٹمنٹ (سی ٹی ڈی) پنجاب نے دہشت گردی کے خلاف کارروائیاں کرتے ہوئے صوبے کے مختلف اضلاع میں 158 انٹیلی جنس بیسڈ آپریشنز کیے، جن کے دوران 160 افراد سے پوچھ گچھ کی گئی اور کالعدم تنظیموں سے تعلق رکھنے والے 23 دہشت گردوں کو گرفتار کرلیا گیا۔ ساہیوال سے گرفتار ایک دہشت گرد کا تعلق بھارتی دہشت گرد ایجنسی را (RAW) سے ہے۔
ترجمان سی ٹی ڈی پنجاب کے مطابق گرفتار دہشت گردوں میں ہدایت اللہ، محمد مجاہد، تسلیم حسنین، طارق اللہ، تصدق حسین، میر لئیق خان، محمد زید، محمد زاہد، رب نواز، بختیار احمد، عبدالرؤف، نجیب اللہ، ثناء اللہ، خان محمد، مہتاب احمد، محمد شاہد، علی حیدر، امیر اللہ خان، فضل عباس، امیر رحمان، آصف خان، محمد انعام اور گلبیب خان شامل ہیں۔
ترجمان کے مطابق دہشت گردوں کو اٹک، ملتان، ساہیوال، جہلم، فیصل آباد، ٹوبہ ٹیک سنگھ، خوشاب، میانوالی، بہاولپور، گوجرانوالہ، لاہور، سرگودھا، راولپنڈی اور بھکر سے گرفتار کیا گیا۔ گرفتار دہشت گردوں کا تعلق را ۔فتنہ خوارج اور دیگر تنظیموں سے ہے
ترجمان کے مطابق گرفتار دہشت گردوں کے خلاف 22 مقدمات درج کرلیے گئے ہیں۔ کارروائیوں کے دوران مجموعی طور پر 5 ہزار 140 گرام بارودی مواد، 7 آئی ای ڈیز، 26 ڈیٹونیٹرز، 48 فٹ سیفٹی فیوز وائر، 5 ممنوعہ میگزینز، 128 پمفلٹس، 70 اسٹیکرز، 6 موبائل فونز اور 46 ہزار 150 روپے نقدی برآمد کیے گئے۔
ترجمان کے مطابق گزشتہ چار ہفتوں کے دوران مقامی پولیس اور دیگر قانون نافذ کرنے والے اداروں کے تعاون سے پنجاب بھر میں 4 ہزار 601 کومبنگ آپریشنز بھی کیے گئے۔ ان کارروائیوں کے دوران ایک لاکھ 66 ہزار 553 افراد کو چیک، 402 مشتبہ افراد کو گرفتار، 396 مقدمات درج اور 365 مختلف نوعیت کی برآمدگیاں کی گئیں۔
ترجمان نے کہا کہ کاؤنٹر ٹیررازم ڈیپارٹمنٹ پنجاب محفوظ پنجاب کے ہدف کے تحت دہشت گردوں اور ریاست مخالف عناصر کے خلاف کارروائیاں جاری رکھے ہوئے ہے۔ شہری کسی بھی مشکوک سرگرمی یا دہشت گردی سے متعلق اطلاع سی ٹی ڈی پنجاب کی ہیلپ لائن 0800-11111 پر دے سکتے ہیں۔
پنجاب میں سی ٹی ڈی کا کریک ڈاؤن، 23 دہشت گرد گرفتار، ساہیوال سے را کا دہشت گرد بھی پکڑا گیا
