ہنگورجا (رپورٹ: فیاض محسن سولنگی)
ہنگورجا شہر میں ایک انتہائی افسوسناک واقعہ پیش آیا ہے، جہاں سیٹھ نجم الدین بڑھن پوٹو کی سبزی کی دکان کا شٹر کھولتے ہوئے بجلی کا شدید کرنٹ لگنے سے 15 سالہ نوجوان اسد علی ولد ممتاز نظامانی جاں بحق ہو گیا۔
ذرائع کے مطابق 15 سالہ اسد علی صبح معمول کے مطابق دکان پر پہنچا اور جیسے ہی اس نے دکان کھولنے کے لیے لوہے کا شٹر اوپر کیا، اچانک اس میں دوڑنے والے بجلی کے شدید کرنٹ کی زد میں آ گیا۔ کرنٹ اتنا شدید تھا کہ نوجوان موقع پر ہی بے ہوش ہو کر گر پڑا۔
واقعے کے فوری بعد دکان پر موجود افراد اور علاقہ مکینوں نے تشویشناک حالت میں نوجوان کو ایمرجنسی بنیادوں پر گمس (GIMS) اسپتال منتقل کیا، جہاں ڈاکٹروں کی تمام تر کوششوں کے باوجود وہ جانبر نہ ہو سکا۔
کمسن اسد علی کی ناگہانی موت کی خبر پہنچتے ہی گھر میں کہرام مچ گیا اور پورے علاقے میں غم و سوگ کی فضا چھا گئی۔
اہلِ علاقہ اور سوگواروں نے واقعے پر شدید غم و غصے کا اظہار کرتے ہوئے انتظامیہ سے مطالبہ کیا ہے کہ واقعے کی فوری تحقیقات کی جائیں۔ نیز تجارتی مراکز اور دکانوں میں بجلی کی تاروں اور لوہے کے شٹرز کی باقاعدہ وائرنگ چیکنگ یقینی بنائی جائے تاکہ مستقبل میں ایسے دردناک حادثات سے قیمتی جانوں کو بچایا جا سکے۔
