خوشاب (راجہ نورالہی عاطف سے)
ڈپٹی کمشنر خوشاب ڈاکٹر جہانزیب حسین لابر نے ڈسٹرکٹ پبلک سکول (ڈی پی ایس) جوہرآباد کا دورہ کیا اور سکول میں نئے تعمیر کیے جانے والے ملٹی پرپز ہال کی سائٹ اور بنیاد کا معائنہ کیا۔ اس موقع پر پرنسپل ڈی پی ایس جوہرآباد پروفیسر صلاح الدین، ڈپٹی ڈائریکٹر ڈویلپمنٹ سہیل سکندر رانجھا، ایکسیئن بلڈنگ حافظ محمد عدنان سمیت متعلقہ محکموں کے افسران بھی موجود تھے۔ ڈپٹی ڈائریکٹر ڈویلپمنٹ سہیل سکندر رانجھا اور ایکسیئن بلڈنگ حافظ محمد عدنان نے ڈپٹی کمشنر خوشاب کو ملٹی پرپز ہال کی تعمیر، بنیاد کی تیاری، تعمیراتی کام کے آغاز، تخمینہ لاگت، مقررہ مدتِ تکمیل اور دیگر متعلقہ امور کے بارے میں تفصیلی بریفنگ دی۔ ڈپٹی کمشنر ڈاکٹر جہانزیب حسین لابر نے متعلقہ افسران کو ہدایت کی کہ ملٹی پرپز ہال کی تعمیر میں بنیاد کی مضبوطی، پائیداری اور تعمیراتی معیار کو ہر صورت یقینی بنایا جائے۔ انہوں نے کہا کہ تعمیراتی منصوبے میں مقررہ معیار اور منظور شدہ ڈیزائن کے مطابق کام کو یقینی بنایا جائے۔ ڈپٹی کمشنر نے مزید ہدایت کی کہ ملٹی پرپز ہال کی تعمیر میں استعمال ہونے والے تعمیراتی میٹریل کے معیار کو تکنیکی بنیادوں پر باقاعدگی سے چیک کیا جائے اور تعمیراتی کام کی کڑی نگرانی کی جائے۔ انہوں نے واضح کیا کہ ناقص یا غیر معیاری میٹریل کے استعمال پر کسی قسم کا سمجھوتہ نہیں کیا جائے گا اور تعمیراتی معیار پر کوئی سمجھوتہ قابل قبول نہیں ہوگا۔