قرآن و سنت کی تعلیمات پر خلوصِ نیت سے مکمل عمل پیرا ہو کر ایک مثالی معاشرہ تشکیل دیا جا سکتا ہے گفتگو
خوشاب (راجہ نورالہی عاطف سے)
سابق امیر جماعت اسلامی ضلع خوشاب ایڈووکیٹ ملک محمد وارث جسرا نے کہا ہے کہ ہمارا پیارا مذہب اسلام ایک مکمل ضابطۂ حیات ہے اور اس کی سنہری تعلیمات انسانیت کے لیے مینارۂ نور کی حیثیت رکھتی ہیں۔ قرآن و سنت کی تعلیمات پر خلوصِ نیت سے مکمل عمل پیرا ہو کر ایک مثالی معاشرہ تشکیل دیا جا سکتا ہے ۔
وہ میڈیا سے خصوصی گفتگو کر رہے تھے۔ ملک محمد وارث جسرا نے کہا کہ اسلام نے زندگی کے ہر شعبے کے لیے واضح رہنمائی فراہم کی ہے۔ عبادات کے ساتھ ساتھ معاملات، معاشرت، تجارت، عدل و انصاف، حقوق العباد اور باہمی اخوت کے حوالے سے بھی اسلام کی تعلیمات ہمارے لیے مشعلِ راہ ہیں۔
آج معاشرے کو درپیش بہت سے مسائل کی بنیادی وجہ اسلامی اقدار اور اخلاقی اصولوں سے دوری ہے۔ ضرورت اس امر کی ہے کہ ہم قرآن و سنت سے اپنا تعلق مضبوط کریں، اپنے کردار و عمل کو اسلامی تعلیمات کے مطابق ڈھالیں اور دوسروں کے حقوق کا خیال رکھتے ہوئے معاشرے میں محبت، رواداری، عدل اور بھائی چارے کو فروغ دیں۔
اسلام امن، محبت، مساوات اور انسانیت کی خدمت کا درس دیتا ہے۔ اگر ہم اسلامی تعلیمات کو اپنی انفرادی اور اجتماعی زندگی کا حصہ بنا لیں تو معاشرے سے ناانصافی، بدامنی اور بے راہ روی کا خاتمہ ممکن ہے اور ایک پرامن، خوشحال اور باکردار معاشرے کی بنیاد رکھی جا سکتی ہے۔