خوشاب (راجہ نورالہی عاطف سے)
ڈسٹرکٹ پبلک سکول جوہرآباد میں محفلِ سیرتِ رِحمٙتُ اللعالمین خاتم النبیین کانفرنس منعقد ہوئی۔ ڈپٹی کمشنر خوشاب ڈاکٹر جہانزیب حُسین لابرنے بطور مہمان خصوصی شرکت کی۔ اس موقع پر ڈی پی ایس سکول کے پرنسیپل پروفیسر صلاح الدین نے ڈپٹی کمشنر خوشاب ڈاکٹر جہانزیب حُسین لابر کا استقبال کیا اور پھولوں کاگلدستہ پیش کیا ۔محفل سیرت النبی ﷺ کانفرنس کا باقاعدہ آغاز تلاوت کلام پاک سے ہوا۔ سکول کی طالبات نے نعتیہ کلام پیش کیا اور سیرت النبی ﷺ کے موضوع پر تقاریر کیں۔ ڈپٹی کمشنر خوشاب نے محفل سیرت النبی ﷺ کانفرنس میں حصہ لینے والی طالبات کی تلاوت کلام پاک ،نعتیہ کلام ،سیرت النبی ﷺ اوردین اسلام پر خطابت کی ستائش کی اور بچوں کی آپؐ سے دلی محبت، محنت ،ہمت وجذبہ کو سلام پیش کیا ۔ محفل سیرت رحمت اللعالمین خاتم النبیین کانفرنس کے اختتام پر دین اسلام کی بُلندی اور ملک وقوم کی سلامتی کے لیے خصوصی دُعا کرائی گئی اور پاکستان کا قومی ترانہ بھی پڑھا گیا۔بعد ازاں ڈپٹی کمشنر خوشاب ڈاکٹر جہانزیب حُسین لابر کو پرنسیپل ڈی پی ایس سکول پروفیسر صلاح الدین نے شیلڈ بھی پیش کی ۔اس عظیم الشان تقریب میں اسسٹنٹ کمشنر خوشاب اُمت السلام، ڈی پی ایس سکول جوہرآباد کے اساتذہ اور طلباء طالبات نے بھرپورشرکت کی۔