لاہور:وزیراعلیٰ پنجاب مریم نواز شریف کے ویژن کے تحت صوبے کے ڈویژن اور اضلاع کے بعد اب ہر تحصیل کی سطح پر جدید الیکٹروبس سروس کا آغاز کیا جا رہا ہے، جس کے تحت جنوری 2027 سے پنجاب بھر میں 1500 نئی الیکٹروبسیں چلائی جائیں گی۔
حکومتِ پنجاب کی جانب سے جاری کردہ تفصیلی پلان کے مطابق تحصیل الیکٹروبس سروس کا پہلا بیج جنوری 2027 میں لاہور پہنچ جائے گا، جبکہ جون 2027 تک صوبے بھر میں کل 3 ہزار الیکٹروبسیں رواں دواں ہوں گی۔ اس منصوبے کے تحت ہر تحصیل کے لیے ایک مخصوص الیکٹروبس ڈپو کی منظوری بھی دے دی گئی ہے، اور ستمبر تک اس سروس کا پہلا فیز مکمل کرنے کا ہدف مقرر کیا گیا ہے۔
مختلف اضلاع اور تحصیلوں کے لیے بسوں کی تقسیم کا حتمی خاکہ بھی سامنے آ گیا ہے، جس کے تحت:
راولپنڈی (16 تحصیلیں): 219 الیکٹروبسیں
بہاولپور (11 تحصیلیں): 215 الیکٹروبسیں
فیصل آباد (12 تحصیلیں): 202 الیکٹروبسیں
سرگودھا (14 تحصیلیں): 198 الیکٹروبسیں
ملتان (9 تحصیلیں): 169 الیکٹروبسیں
گوجرانوالہ (7 تحصیلیں): 125 الیکٹروبسیں
گجرات (8 تحصیلیں): 122 الیکٹروبسیں
ساہیوال (4 تحصیلیں): 87 الیکٹروبسیں
ڈی جی خان (10 تحصیلیں): 63 الیکٹروبسیں
اس کے علاوہ بھکر، حافظ آباد، خانیوال، چنیوٹ، لیہ، اوکاڑہ، سیالکوٹ، مری، شیخوپورہ، منڈی بہاؤالدین، وہاڑی، قصور، لودھراں، ننکانہ صاحب اور نارووال سمیت دیگر اضلاع میں بھی اضافی بسیں فراہم کی جائیں گی۔ صوبے کے مختلف شہروں میں پہلے ہی 612 الیکٹروبسیں مکمل طور پر آپریشنل ہیں جن سے روزانہ لاکھوں شہری مستفید ہو رہے ہیں، جبکہ ملتان اور دیگر اضلاع میں مزید 192 بسیں چند روز میں فنکشنل کر دی جائیں گی۔ مسافروں کی سہولت کے لیے فیصل آباد اور گوجرانوالہ میں ماس ٹرانزٹ سسٹم پر بھی تیزی سے کام جاری ہے۔