دبئی:متحدہ عرب امارات (یو اے ای) کی حکومت نے بیرونِ ملک سے نئے ملازمین اور کارکنان کی بھرتی کے پورے نظام کو انقلابی انداز میں تبدیل کرتے ہوئے ایک انتہائی جدید ڈیجیٹل ورک پرمٹ سروس کا اجراء کر دیا ہے۔ اس نئی سہولت کا بنیادی مقصد کارپورٹ سیکٹر اور کاروباری اداروں کو درپیش طویل انتظامی مراحل اور کاغذی کارروائی سے نجات دلانا ہے تاکہ بھرتی کا عمل انتہائی کم وقت میں اور باآسانی مکمل ہو سکے۔
وزارتِ انسانی وسائل و اماراتائزیشن (MoHRE) کی جانب سے شروع کی گئی اس ڈیجیٹل سروس کے تحت اب رجسٹرڈ ادارے روایتی دفتری چکروں سے بے نیاز ہو کر گھر بیٹھے آن لائن پورٹل پر اپنی درخواستیں جمع کرا سکتے ہیں۔ آجر حضرات مطلوبہ معلومات اور تمام ضروری قانونی دستاویزات چند منٹوں میں اپ لوڈ کر کے بیرونِ ملک سے ورکرز کی ریکروٹمنٹ کا عمل تیزی سے آگے بڑھا سکتے ہیں، جس سے کمپنیوں کے قیمتی وقت اور وسائل کی بڑی بچت ہوگی۔
ملازمین کے حقوق کا تحفظ: تمام اخراجات اب آجر کے ذمے
یو اے ای حکومت کی جانب سے جاری کردہ نئی اور سخت ہدایات کے مطابق، بیرونِ ملک سے کارکنان کو ملک میں لانے کے دوران اٹھنے والے تمام تر اخراجات اب صریحاً آجر (مالک یا کمپنی) کی ذمہ داری ہوں گے۔
ان اخراجات میں بھرتی کی فیس، سرکاری جاب پرمٹ کی فیس، لازمی میڈیکل چیک اپ، ہیلتھ انشورنس، دیگر ضروری شراکتیں اور تمام مالی ضمانتیں شامل ہیں۔ وزارت نے واضح کر دیا ہے کہ کسی بھی غریب یا غیر ملکی ورکر سے نوکری کے نام پر کوئی بھی پوشیدہ فیس یا کٹوتی نہیں کی جا سکے گی، جسے تارکینِ وطن ورکرز کے حقوق کے تحفظ کے لیے ایک تاریخی اور انتہائی خوش آئند قدم قرار دیا جا رہا ہے۔ ماہرین کا کہنا ہے کہ یہ ڈیجیٹل اقدام ملک میں شفافیت لانے اور یو اے ای کے اس وسیع تر وژن کو عملی جامہ پہنانے میں مدد دے گا جس کے تحت تمام سرکاری خدمات کو مکمل طور پر ڈیجیٹل اور پیپر لیس بنایا جا رہا ہے۔