سیالکوٹ ۔سلیم احمد اعوان شیخو
ایڈیشنل ڈپٹی کمشنر سیالکوٹ میاں سرمد حسین کی زیرِ صدارت ڈسٹرکٹ کوالٹی کنٹرول بورڈ کا 155واں اجلاس منعقد ہوا، جس میں ضلع بھر کے میڈیکل اسٹورز اور ادویات کی فروخت سے متعلق مجموعی طور پر 43 کیسز کی سماعت کی گئی۔
اجلاس میں ڈرگ انسپکٹرز کی جانب سے پیش کیے گئے کیسز کا تفصیلی جائزہ لیا گیا اور ادویات کی خرید و فروخت، لائسنس، رجسٹریشن، معیار اور میعاد سے متعلق قانونی تقاضوں پر عملدرآمد کا جائزہ لیا گیا۔
بورڈ نے بغیر ڈرگ سیل لائسنس ادویات فروخت کرنے، ممنوعہ اور غیر رجسٹرڈ ادویات رکھنے یا فروخت کرنے جبکہ زائد المیعاد ادویات کی فروخت کے الزامات سے متعلق 8 میڈیکل اسٹورز کے کیسز ڈرگ کورٹس کو بھجوانے کی منظوری دی۔
اجلاس میں 11 میڈیکل اسٹورز کے خلاف مزید کارروائی سے قبل ڈرگ انسپکٹرز کو ری وزٹ کرنے کی ہدایت کی گئی، تاکہ موقع پر دوبارہ معائنہ کرکے قانونی تقاضوں کے مطابق رپورٹ پیش کی جا سکے۔
اسی طرح 22 میڈیکل اسٹور مالکان کو وارننگ جاری کرتے ہوئے آئندہ قوانین اور ضوابط کی مکمل پابندی یقینی بنانے کی ہدایت کی گئی، جبکہ 3 کیسز کو آئندہ اجلاس تک موخر کر دیا گیا۔
ایڈیشنل ڈپٹی کمشنر میاں سرمد حسین نے متعلقہ افسران کو ہدایت کی کہ ادویات کی فروخت کے حوالے سے مقررہ قوانین پر سختی سے عملدرآمد یقینی بنایا جائے اور غیر معیاری، غیر رجسٹرڈ، ممنوعہ اور زائد المیعاد ادویات کی فروخت کے خلاف بلاامتیاز کارروائی کی جائے۔ انہوں نے کہا کہ شہریوں کو محفوظ اور معیاری ادویات کی فراہمی ریاست کی بنیادی ذمہ داری ہے اور اس معاملے میں کسی قسم کی غفلت یا کوتاہی برداشت نہیں کی جائے گی۔
اجلاس میں ڈرگ کنٹرول سے متعلق دیگر امور بھی زیرِ غور آئے اور متعلقہ افسران کو بورڈ کے فیصلوں پر مقررہ ضابطے کے مطابق عملدرآمد یقینی بنانے کی ہدایات جاری کی گئیں۔