منی پور میں آگ وخون کا کھیل جاری: مسلح حملہ آوروں کا تین ناگا دیہات پر دھاوا، 30 سے زائد گھر نذر آتش

امپھال:بھارتی ریاست منی پور میں حالات بدستور کشیدہ اور قابو سے باہر ہوتے جا رہے ہیں۔ کانگپوکپی ضلع میں تشدد کا ایک نیا اور ہولناک سلسلہ اس وقت سامنے آیا جب مسلح حملہ آوروں نے تین لیانگمئی ناگا دیہات کو گھیرے میں لے کر فائرنگ کی اور درجنوں گھروں کو جلا کر راکھ کا ڈھیر بنا دیا۔ مسلسل دوسرے روز ہونے والے اس خونی حملے کے بعد پورے علاقے میں خوف و ہراس کی فضا چھائی ہوئی ہے، جبکہ فائرنگ کے اس تبادلے میں ایک مقامی باشندہ گولی لگنے سے شدید زخمی ہو گیا ہے۔
پولیس حکام کے مطابق یہ حملہ منگل کے روز صبح تقریباً 4 بجے ٹاپون کھلن، ٹاپون کھنو اور ماکوئی پیپورام کے دیہات میں کیا گیا۔ حملہ آوروں نے پہلے سے طے شدہ منصوبے کے تحت اچانک اندھادھند فائرنگ شروع کر دی اور موقع پاتے ہی درجنوں رہائشی مکانات، گاڑیوں اور دیگر قیمتی املاک کو آگ لگا دی۔
بگڑتی ہوئی سنگین صورتحال پر قابو پانے کے لیے ’سنٹرل ریزرو پولیس فورس‘ (CRPF)، اس کے خصوصی ’کوبرا یونٹ‘ اور منی پور پولیس کے اضافی دستوں کو فوری طور پر علاقے میں تعینات کر کے سخت سرچ آپریشن شروع کر دیا گیا ہے۔