سال 2027 کے نئے ضوابط سے قبل انڈسٹری کی جانب سے حفاظت کو اولین ترجیح دینے کا فیصلہ، گاڑیوں میں سافٹ ویئر اپ ڈیٹس جاری
بیجنگ:چین میں حفاظتی خدشات اور معیارات کو بہتر بنانے کے لیے ایک بڑا اقدام اٹھاتے ہوئے ٹیسلا اور چین کی دیگر معروف کار ساز کمپنیوں نے 40 لاکھ سے زائد گاڑیاں واپس (ری کال) منگا لی ہیں۔ یہ حفاظتی اقدامات بنیادی طور پر گاڑیوں کے دروازوں کے ہینڈل (Door Handles) سے جڑے تکنیکی مسائل کے پیشِ نظر کیے گئے ہیں۔
چین کے اسٹیٹ ایڈمنسٹریشن فار مارکیٹ ریگولیشن کے مطابق، امریکی کار ساز کمپنی ٹیسلا اکیلے چین میں تیار کردہ اور باہر سے منگوائی گئی تقریباً 29.8 لاکھ الیکٹرک گاڑیاں واپس لے رہی ہے، جن میں ماڈل 3، ماڈل وائی، ماڈل ایکس اور ماڈل ایس شامل ہیں۔ چینی میڈیا کے مطابق یہ رواں سال کا سب سے بڑا ری کال ہے۔
چینی حکام نے فروری میں یہ اعلان کیا تھا کہ آئندہ سال سے الیکٹرک گاڑیوں میں عام طور پر استعمال ہونے والے ‘چھپے ہوئے یا فلش ڈور ہینڈل’ پر پابندی عائد کر دی جائے گی۔ ملک اور بیرون ملک پیش آنے والے بعض ایسے حادثات کے بعد جن میں کاروں کے الیکٹرانک ہینڈل فیل ہو گئے تھے اور لوگ اندر پھنس گئے تھے، ریگولیٹرز نے ان سسٹمز کی جانچ پڑتال سخت کر دی ہے۔
Tesla recalls 3 MILLION e-cars in China… over door handle color
On Models 3, X and S the mechanical door handles are apparently too hard to see in an emergency as they blend into the interior
Tesla plans to solve it with colored stickers and a software update pic.twitter.com/NqQ4drp88z
— RT Intl (@RT_on_X) August 21, 2026
سرکاری نوٹس میں خبردار کیا گیا ہے کہ انتہائی صورتحال میں، مثلاً کسی زوردار ٹکر کے بعد گاڑی کا الیکٹریکل سسٹم فیل ہو جانے کی صورت میں، یہ ہینڈلز اندر بیٹھے افراد کے لیے دروازہ کھول کر باہر نکلنا یا ریسکیو عملے کے لیے اندر پہنچنا مشکل بنا سکتے ہیں۔ اس خطرے کو ٹالنے کے لیے ٹیسلا اور دیگر کمپنیاں گاڑیوں کے سافٹ ویئر کو اپ ڈیٹ کر رہی ہیں۔
ٹیسلا کے علاوہ بیجنگ کی ٹیکنالوجی کمپنی شیاؤمی (Xiaomi) 3,90,000 سے زائد، ہانگژو کی لیپ موٹر (Leapmotor) 3,70,000 سے زیادہ جبکہ جیلی اور ایکسپینگ جیسی کمپنیاں بھی اسی نوعیت کے مسائل کے باعث اپنی گاڑیاں واپس منگا رہی ہیں۔
چائنا پیسنجر کار ایسوسی ایشن کے حکام کا کہنا ہے کہ تیزی سے ترقی کرتی ہوئی نیو انرجی وہیکل (NEV) انڈسٹری میں مقابلے کی فضا کے ساتھ ساتھ حفاظت کے اعلیٰ معیارات کو اپنانا ناگزیر ہے تاکہ صارفین کی جان و مال کا تحفظ یقینی بنایا جا سکے۔