بلوچستان رحمت اللہ بلوچ بیوروچیف بے نقاب نیوز)
شہر بھر میں مبینہ خود ساختہ پارکنگ پرچیوں اور غیر قانونی پارکنگ کے باعث ٹریفک کا نظام شدید متاثر ہونے کی شکایات سامنے آ رہی ہیں۔ جس طرف دیکھیں، پارکنگ کے نام پر پرچیاں دی جا رہی ہیں اور سڑکوں کے کناروں پر مبینہ طور پر غیر مجاز پارکنگ قائم کر دی گئی ہے، جس سے شہریوں کو شدید مشکلات کا سامنا ہے۔
جناح روڈ، زہری مسجد کے اطراف پارکنگ کا دوہرا معیار؟
ایک جانب ٹریفک پولیس کی جانب سے جناح روڈ، زہری مسجد کے اطراف پارکنگ پر پابندی عائد کی جا رہی ہے، جبکہ دوسری جانب مبینہ طور پر بعض افراد گاڑیاں پارک کروانے کے عوض پرچیاں جاری کر رہے ہیں۔شہریوں کا سوال ہے کہ اگر اس علاقے میں پارکنگ ممنوع ہے تو پھر پرچی کے ذریعے پارکنگ کی اجازت کس کی ہدایت پر دی جا رہی ہے؟ کیا یہ پارکنگ باقاعدہ قانونی منظوری کے تحت قائم ہے یا معاملہ کسی مبینہ غیر قانونی انتظام کا حصہ ہے؟
شہریوں نے متعلقہ حکام سے مطالبہ کیا ہے کہ معاملے کی شفاف تحقیقات کر کے حقیقت عوام کے سامنے لائی جائے، غیر قانونی پارکنگ اور خود ساختہ پرچیوں کا خاتمہ کیا جائے اور جناح روڈ سمیت پورے کوئٹہ میں پارکنگ کے حوالے سے واضح، قانونی اور یکساں پالیسی نافذ کی جائے۔