بلوچستان رحمت اللہ بلوچ بیوروچیف بے نقاب نیوز)
ہیلتھ پروفیشنل الاؤنس اور رسک الاؤنس میں اضافہ کیا جائے
پاکستان پیرا میڈیکل اسٹاف ایسوسی ایشن رجسٹرڈ 2076 بلوچستان حکومتِ بلوچستان اور محکمہ صحت سے پُرزور مطالبہ کرتی ہے کہ صوبے بھر کے پیرامیڈیکل سٹاف کے ہیلتھ پروفیشنل الاؤنس اور رسک الاؤنس میں موجودہ حالات کے مطابق خاطر خواہ اضافہ کیا جائے۔پیرامیڈیکل اسٹاف صحت کے شعبے میں فرنٹ لائن پر اپنی خدمات سرانجام دے رہا ہے۔ ہسپتالوں، ایمرجنسیز، لیبارٹریز، آپریشن تھیٹرز، مراکزِ صحت اور دیگر طبی اداروں میں کام کرنے والے پیرامیڈیکس کو روزانہ مختلف بیماریوں، انفیکشنز، ہنگامی حالات اور دیگر پیشہ ورانہ خطرات کا سامنا رہتا ہے۔مہنگائی میں مسلسل اضافے، روزمرہ اخراجات میں بے پناہ اضافے اور موجودہ معاشی حالات کے پیشِ نظر موجودہ الاؤنسز پیرامیڈیکل سٹاف کی ضروریات اور پیشہ ورانہ ذمہ داریوں کے مقابلے میں ناکافی ہیں۔ لہٰذا حکومت بلوچستان فوری طور پر ہیلتھ پروفیشنل الاؤنس اور رسک الاؤنس میں مناسب اور باعزت اضافہ کرے۔
خصوصاً بلوچستان کے دور دراز اور دشوار گزار علاقوں میں خدمات انجام دینے والے پیرامیڈیکس کو اضافی مشکلات اور خطرات کا سامنا کرنا پڑتا ہے۔ ایسے ملازمین کی خدمات کو مدنظر رکھتے ہوئے انہیں خصوصی مراعات اور مناسب رسک الاؤنس دیا جانا وقت کی اہم ضرورت ہے۔
پاکستان پیرا میڈیکل اسٹاف ایسوسی ایشن رجسٹرڈ 2076 بلوچستان کا مطالبہ ہے کہ:
ہیلتھ پروفیشنل الاؤنس میں فوری اور خاطر خواہ اضافہ کیا جائے۔
رسک الاؤنس میں موجودہ مہنگائی اور پیشہ ورانہ خطرات کے تناسب سے اضافہ کیا جائے۔
بلوچستان بھر کے پیرامیڈیکس کو یکساں اور منصفانہ بنیادوں پر الاؤنسز فراہم کیے جائیں۔
دور دراز اور حساس علاقوں میں تعینات پیرامیڈیکل اسٹاف کے لیے خصوصی رسک مراعات مقرر کی جائیں۔
پیرامیڈیکل اسٹاف کے نمائندگان کو اعتماد میں لے کر الاؤنسز کے حوالے سے جامع پالیسی تشکیل دی جائے۔
ہم واضح کرنا چاہتے ہیں کہ پیرامیڈیکل اسٹاف صحت کے نظام کی ریڑھ کی ہڈی ہے۔ ان کی خدمات، محنت اور قربانیوں کا تقاضا ہے کہ حکومت ان کے جائز مالی حقوق اور مراعات میں اضافہ کرے۔
پاکستان پیرا میڈیکل اسٹاف ایسوسی ایشن رجسٹرڈ 2076 بلوچستان حکومت سے پُرزور اپیل کرتی ہے کہ اس اہم اور جائز مطالبے پر فوری توجہ دیتے ہوئے ہیلتھ پروفیشنل الاؤنس اور رسک الاؤنس میں خاطر خواہ اضافہ کیا جائے، تاکہ پیرامیڈیکل اسٹاف مزید جذبے اور اطمینان کے ساتھ عوام کی خدمت جاری رکھ سکے۔
پیرامیڈیکس کا حق — الاؤنسز میں فوری اضافہ
"پیرامیڈیکس مضبوط ہوں گے تو بلوچستان کا صحت کا نظام مضبوط ہوگا