راولپنڈی :سکیورٹی فورسز نے بلوچستان کے مختلف علاقوں میں انٹیلی جنس بیسڈ آپریشن کرکے 9 دہشتگردوں کو ہلاک کر دیا۔
نجی ٹی وی چینل کے مطابق سکیورٹی ذرائع کا کہنا ہے کہ آپریشن ردالفتنہ 3 کے تحت بلوچستان کےمختلف علاقوں میں دہشتگردوں کیخلاف سکیورٹی فورسز کی کامیاب کارروائیاں جاری ہیں۔
سکیورٹی ذرائع کے مطابق زیارت اور ہرنائی کے درمیان پہاڑی علاقے میں خفیہ اطلاع پر کارروائی کی گئی، جہاں دہشتگردوں کے ٹھکانے کو گھیرے میں لے کر مؤثر انداز میں نشانہ بنایا گیا۔ کارروائی میں 8 دہشتگرد ہلاک جبکہ ان کا ٹھکانہ بھی تباہ کر دیا گیا۔ذرائع کے مطابق ضلع سوراب کےعلاقے حاجیکہ گاؤں میں کامیاب آپریشن کے دوران ایک دہشتگرد جہنم واصل ہوا ، فورسز نے دشت کٹائی اور حاجیکہ کے درمیان مؤثرناکہ بندی کی اوردہشتگردوں کی نقل وحرکت کا سراغ لگایا۔
ہلاک دہشتگردوں کے قبضے سے ایمونیشن، میگزین، دستی بم، واکی ٹاکی، موٹر سائیکل اور دیگر سامان برآمد کر لیا گیا۔
سکیورٹی ذرائع کا کہنا ہے کہ سکیورٹی فورسزبلوچستان میں دہشتگردی کے مکمل خاتمےاوردیرپا امن کے قیام تک بلا تعطل اپنی کارروائیاں جاری رکھنے کے عزم پر قائم ہیں۔
گزشتہ روز بھی بلوچستان کے علاقے کلی زائیک میں سکیورٹی فورسز کی کارروائیوں کے دوران 2 دہشتگرد ہلاک اور 3 زخمی ہوئے تھے۔ ہلاک ایک دہشتگرد کی شناخت مشتاق احمد عرف کوہ یار کے نام سے ہوئی ،جن سے ایمونیشن، میگزین،دستی بم اور دھماکا خیز مواد برآمد ہوا تھا۔
بلوچستان کے مختلف علاقوں میں انٹیلی جنس بیسڈ آپریشن ، 9 دہشت گرد ہلاک کردئیے گئے
