سکھر( ڈویزنل بیوروچیف نصیر لاشاری کی رپورٹ )
چیف کمشنر ایف بی آر سکھرضیغم عباس نے کہا ہے کہ ٹیکس کی ادائیگی قومی فریضہ ہے، حکومت اور محکمہ ایف بی آر کی جانب سے چھوٹے تاجروں کو ٹیکس مسائل سے نجات دلانے کیلئے ایک آسان اور سادہ ٹیکس نظام متعارف کرایا گیا ہے تاکہ ہر دکاندار آسانی سے ٹیکس ادا کر کے ملکی ترقی، خوشحالی میں اپنا کردار ادا کرسکے۔ ان خیالات کا اظہار انہوں نے اپنے دفتر میں مرکزی تنظیم تاجران پاکستان کے نائب صدر و سکھر اسمال ٹریڈرز کے صدر حاجی محمد جاوید میمن و دیگر عہدیداران کے ساتھ آسان اور سادہ ٹیکس اسکیم متعارف کرانے اور چھوٹے تاجروں کو آگاہی دینے کیلئے منعقدہ اجلاس کے دوران گفتگو کرتے ہوئے کیا۔اس موقع پر سکھر اسمال ٹریڈرز کے جنرل سیکریٹری محمد عامر فاروقی، سینئر نائب صدر خورشید احمد میرانی، نائب صدور حاجی رئیس قریشی، محمد منیر میمن، محبوب صدیقی، لیاقت علی،عدنان اعظم خان، محمد فیصل شیخ، ڈاکٹر سعید اعوان، محمد عرفان، شاہد حسین بھٹو، اعظم اعوان، علی میمن، عارف خان، سمیت کمشنر ایف بی آر و فوکل پرسن برائے ٹیکس آسان اسکیم آر ٹی او سکھر ڈاکٹر پرویز احمد شر، ایڈیشنل کمشنر جوہر علی شاہ، ڈپٹی کمشنر عبدالمجید سانگی ودیگر بھی موجود تھے۔اجلاس سے خطاب کرتے ہوئے چیف کمشنر سکھر ضیغم عباس کا مزید کہنا تھا کہ حکومت اور چھوٹے تاجروں کی طویل مشاورت کے بعد ملکی تاریخ میں پہلی بار آسان ٹیکس اسکیم متعارف کرائی گئی ہے، جس میں سالانہ 20 کروڑ روپے ٹرن آور والے چھوٹے دکاندارسالانہ صرف 25 ہزار روپے فیکسڈ ٹیکس ادا کر کے آڈٹ ، ڈیجیٹل انوائس سے استشنیٰ سمیت دیگر مسائل سے چھٹکارا حاصل کرینگے۔ چھوٹے تاجر اپنے موبائل ایپ کے ذریعے بھی رجسٹرڈ ہوسکتے ہیں جبکہ ان کی سہولیات اور رہنمائی کے لیے ایف بی آر دفاتر میں ڈیسک بھی قائم کیا گیا ہے جہاں پر انہیں مکمل معلومات اور رہنمائی فراہم کی جائے گی اور فکسڈ ٹیکس اسکیم میں رجسٹرڈ دکانداروں کو محکمہ ایف بی آر کی جانب سے گرین پلیٹ فراہم کی جائے گی جووہ اپنی دکانوں پر نصب کرینگے جس کے بعد کوئی بھی افسر ان سے پوچھ گوچھ نہیںکرسکتا۔ اس موقع پر حاجی محمد جاوید میمن و دیگر تاجروں نے چھوٹے تاجروں کیلئے متعارف کرائی گئی فکسڈ ٹیکس اسکیم کا خیر مقدم کرتے ہوئے دیگر تاجروں بالخصوص جیولرز کے ٹیکس مسائل پر بھی چیف کمشنر کو تفصیلی طور پر آگاہ کیا اور ان کے مسائل کے حل کیلئے اپنی تجاویز پیش کرتے ہوئے مطالبہ کیا کہ جس طرح حکومت سالانہ 20 کروڑ روپے ٹرن اور والے دکانداروں کیلئے فکسڈ ٹیکس اسکیم متعارف کرائی ہے، اسی طرح جیولرز اور دیگر کاروبار کرنے والے تاجروں کیلئے بھی آسان ٹیکس اسکیم متعارف کرائی جائے اور ٹیکس کی ادائیگی کیلئے انکم ٹیکس گوشواروں کے پیچیدہ اور مشکل ریٹرن فارم کو بھی آسان کیا جائے تاکہ ہر تاجر آسانی سے ٹیکس ادا کرسکے۔