کیلے فورنیا: میٹا کے بانی اور چیف ایگزیکٹو آفیسر (سی ای او) مارک زکربرگ نے کمپنی کی سہ ماہی آمدنی کے موقع پر سرمایہ کاروں کے سامنے ایک انتہائی پرامید اور جرات مندانہ مستقبل کا نقشہ پیش کیا ہے۔ زکربرگ کا دعویٰ ہے کہ آنے والے پانچ سالوں کے اندر دنیا بھر میں اربوں افراد کے پاس اپنے ذاتی مصنوعی ذہانت (اے آئی) ایجنٹس موجود ہوں گے جو ان کے روزمرہ کے مقاصد کو سمجھ کر ان کے لیے چوبیس گھنٹے خدمات انجام دیں گے۔
زکربرگ کے مطابق، یہ جدید اے آئی ایجنٹس لوگوں کو ان کے مالی معاملات، صحت، ذاتی تعلقات اور گھریلو انتظامات سنبھالنے میں بھرپور مدد فراہم کریں گے۔ انہوں نے اس بات پر بھی زور دیا کہ جیسے جیسے صارفین ایک سے زائد اے آئی ایجنٹس کے ساتھ بات چیت کے عادی ہوں گے، واٹس ایپ جیسے مقبول میسجنگ پلیٹ فارمز کی اہمیت میں مزید اضافہ ہو جائے گا۔
واضح رہے کہ واٹس ایپ پہلے ہی ’میٹا اے آئی‘ کے استعمال کے لیے دنیا کا سب سے بڑا پلیٹ فارم بن چکا ہے۔ اس میدان میں صرف میٹا اکیلا نہیں ہے بلکہ گوگل نے بھی کسٹم ایجنٹس کو اپنی سرچ سروس کا مرکزی حصہ بنا دیا ہے، جبکہ اینتھراپک (Anthropic) کے ’کلود کوڈ‘ جیسے کوڈنگ ٹولز کی سبسکرپشنز میں بھی تیزی سے اضافہ ہو رہا ہے۔
ایک طرف جہاں زکربرگ مستقبل کے روشن خواب دکھا رہے ہیں، وہیں سرمایہ کاروں کا اعتماد فی الحال متزلزل نظر آتا ہے۔ آمدنی کی حالیہ رپورٹ جاری ہونے کے بعد میٹا کے حصص (Stocks) میں تقریباً 10 فیصد کی نمایاں کمی واقع ہوئی ہے۔ اس گراوٹ کی بڑی وجہ میٹا کا ’ریئلٹی لیبز‘ (Reality Labs) ڈویژن ہے، جو ورچوئل ریالٹیVR ہیڈسیٹس اور آگمینٹڈ ریالٹی AR گلاسز پر کام کر رہا ہے۔ اس اکیلے ڈویژن کو حالیہ سہ ماہی میں تقریباً 4.6 بلین ڈالر کا نقصان اٹھانا پڑا ہے، جس کے بعد 2021 سے لے کر اب تک اس کا مجموعی خسارہ حیران کن طور پر 88 بلین ڈالر تک جا پہنچ چکا ہے۔
میٹا کا فری کیش فلو بھی اس سہ ماہی میں 91 فیصد کم ہو کر محض 784 ملین ڈالر رہ گیا ہے، جبکہ گزشتہ سال اسی سہ ماہی میں یہ 8.55 بلین ڈالر تھا۔ اس بڑی کمی کی بڑی وجہ کمپنی کی جانب سے اے آئی انفراسٹرکچر میں کی جانے والی بے پناہ سرمایہ کاری ہے۔ محض رواں ہفتے میٹا نے بلیک راک کے ساتھ شراکت داری کے تحت ٹیکساس کے شہر ایل پاسو میں 14 بلین ڈالر کے ایک نئے ڈیٹا سینٹر بنانے کا بھی اعلان کیا ہے۔
"5 سالوں میں ہر شخص کا اپنا ذاتی اے آئی ایجنٹ ہوگا”،مارک زکر برگ، انسان کیا کرینگے؟ بڑا سوال
