نوابشاہ (نمائندہ بے نقاب نیوز، نفیس آرائیں)
پولیو کے خاتمے کے قومی مشن کے تحت تحصیل سکرنڈ اور قاضی احمد کے دریائی کچے کے علاقوں میں پولیو بوسٹر ڈوز مہم کی کامیاب تکمیل کے لیے تحصیل ہیڈکوارٹر اسپتال سکرنڈ میں اورینٹیشن سیشن منعقد کیا گیا۔سیشن میں ایم ایس تحصیل ہیڈکوارٹر اسپتال ڈاکٹر امتیاز چانڈیو، ڈبلیو ایچ او کے ڈویژنل پولیو افسران ڈاکٹر جھانگیر کورائی، اکبر جونیجو، محکمہ صحت، تعلیم، پی پی ایچ آئی، سوشل ویلفیئر اور دیگر متعلقہ اداروں کے افسران و نمائندگان نے شرکت کی۔شرکاء کو مہم کے اہداف، ٹیموں کی ذمہ داریوں، بچوں تک رسائی، والدین میں آگاہی، سماجی متحرک کاری اور مؤثر نگرانی کے حوالے سے بریفنگ دی گئی۔ حکام کے مطابق سکرنڈ اور قاضی احمد کے دریائی کچے کی 9 یونین کونسلز میں پولیو بوسٹر ڈوز مہم 20 سے 31 اگست 2026ء تک جاری رہے گی
اجلاس میں متعلقہ اداروں کو محکمہ صحت سے بھرپور تعاون، والدین و کمیونٹی میں آگاہی اور تمام بچوں کی ویکسی نیشن یقینی بنانے کی ہدایت کی گئی، جبکہ دریائی علاقوں میں مؤثر رسائی اور سماجی متحرک کاری کے ذریعے مہم کے اہداف حاصل کرنے کے عزم کا اظہار کیا گیا۔