قصور (بیورو چیف محمد وقاص اشرف)
قائم مقام گورنر پنجاب و سپیکر پنجاب اسمبلی ملک محمد احمد خاں اور چیف جسٹس لاہور ہائی کورٹ جسٹس عالیہ نیلم نے ڈسٹرکٹ بار ایسوسی ایشن قصور میں ملک محمد علی خاں ای لائبریری اور لیڈیز بار روم کا افتتاح کیا۔افتتاحی تقریب میں چیئرمین آزاد گروپ ملک ریاض احمد خاں، صدر ڈسٹرکٹ بار ایسوسی ایشن قصور چوہدری محمد احمد لطیف، جنرل سیکرٹری شہباز علی خان، ڈسٹرکٹ اینڈ سیشن جج قصور، ڈپٹی کمشنر قصور، ڈی پی او قصور، ایڈیشنل و سول ججز، سینئر وکلاء اور وکلاء کی کثیر تعداد نے شرکت کی۔اس موقع پر وکلاء برادری کی جانب سے قائم مقام گورنر پنجاب ملک محمد احمد خاں اور چیف جسٹس لاہور ہائی کورٹ جسٹس عالیہ نیلم کا شاندار استقبال کیا گیا۔ بار عہدیداران نے معزز مہمانوں کو گلدستے پیش کیے اور بار کے مختلف ترقیاتی منصوبوں کے حوالے سے بریفنگ دی۔چیف جسٹس عالیہ نیلم نے اپنے خطاب میں کہا کہ وکلاء کو جدید سہولیات کی فراہمی اور عدالتی نظام کی بہتری وقت کی اہم ضرورت ہے۔ انہوں نے ملک محمد علی خاں ای لائبریری اور لیڈیز بار روم کے قیام کو وکلاء خصوصاً نوجوان اور خواتین وکلاء کے لیے ایک مثبت قدم قرار دیا۔قائم مقام گورنر پنجاب ملک محمد احمد خاں نے کہا کہ بار اور بنچ کا مضبوط تعلق انصاف کی مؤثر اور بروقت فراہمی میں اہم کردار ادا کرتا ہے۔ انہوں نے ڈسٹرکٹ بار قصور کی ترقی اور وکلاء کی فلاح و بہبود کے لیے کیے جانے والے اقدامات کو سراہتے ہوئے کہا کہ ایسی سہولیات قانونی برادری کی پیشہ ورانہ استعداد میں اضافے کا باعث بنتی ہیں۔
صدر بار چوہدری محمد احمد لطیف اور جنرل سیکرٹری شہباز علی خان نے معزز مہمانوں کی آمد پر شکریہ ادا کرتے ہوئے کہا کہ ڈسٹرکٹ بار قصور وکلاء کو بہتر سہولیات کی فراہمی اور ادارے کی ترقی کے لیے اپنی کاوشیں جاری رکھے گی۔تقریب کے اختتام پر قائم مقام گورنر پنجاب ملک محمد احمد خاں اور چیف جسٹس لاہور ہائی کورٹ جسٹس عالیہ نیلم کو یادگاری شیلڈز پیش کی گئیں جبکہ شرکاء نے بار میں مکمل ہونے والے ترقیاتی منصوبوں کو خوش آئند قرار دیا۔