سیالکوٹ۔سلیم احمد اعوان شیخو
وزیراعلیٰ پنجاب مریم نواز شریف کے صوبہ بھر میں بنیادی ڈھانچے کی بہتری، ترقیاتی منصوبوں میں اعلیٰ معیار اور شفافیت کے وژن کی روشنی میں انتظامیہ متحرک ہے۔ اسی سلسلہ میں ڈپٹی کمشنر سیالکوٹ اویس مشتاق نے موضع پروپی آرائیاں کا دورہ کیا اور علاقہ مکینوں کی درخواست پر جاری سیوریج اسکیم اور سڑک کی بحالی کے منصوبے کا تفصیلی جائزہ لیا۔دورے کے دوران انہوں نے جاری ترقیاتی کاموں میں استعمال ہونے والے مٹیریل اور تعمیراتی معیار کا باریک بینی سے معائنہ کیا۔ ڈپٹی کمشنر نے متعلقہ حکام کو سخت ہدایات جاری کرتے ہوئے کہا کہ عوامی مفاد کے اس اہم منصوبے کو مقررہ وقت کے اندر ہر صورت مکمل کیا جائے اور معیار پر کسی قسم کا سمجھوتہ نہ کیا جائے۔اس موقع پر ایکسین پبلک ہیلتھ انجینئرنگ ڈیپارٹمنٹ رانا ابرار حسین اور واسا کے ایس ڈی او عدیل احمد بھی ان کے ہمراہ موجود تھے، جنہوں نے ڈپٹی کمشنر کو منصوبے کی پیش رفت اور تکنیکی پہلوؤں کے بارے میں تفصیلی بریفنگ دی۔علاقہ مکینوں نے فوراً نوٹس لینے اور موقع پر آ کر مسائل کے حل کے لیے احکامات جاری کرنے پر ڈپٹی کمشنر سیالکوٹ کا شکریہ ادا کیا۔