ہنزہ :پاکستان کی حدود میں واقع دنیا کے 12ویں بلند ترین پہاڑ ‘براڈ پیک’ پر جمعرات کے روز ایک خوفناک برفانی تودہ (ایوالانچ) گرنے سے معروف برطانوی-نیپالی کوہ پیما اور نیٹ فلکس ڈاکومینٹری "14 پیکس” کے ہیرو نِرمُل پُرجا سمیت 10 افراد لاپتہ ہوئے تھے تاہم ان میں سے 3 افراد کی لاشیں مل گئی ہیں۔ تاہم باقی افراد کی تلاش کیلئے پاک آرمی مصروف عمل ہے۔
Rescue operation on Broad Peak. The climbers who died in the accident are being brought back by helicopter.@broadpeak @Alpine_Pakistan @PakistanJannatt pic.twitter.com/moalbuLPQJ
— K2 EXPRESS TV GB (@sadiqsidiqiGB_) August 1, 2026
پاکستانی فوج، مقامی انتظامیہ اور الپائن کلب آف پاکستان کی جانب سے جاری کردہ اطلاعات کے مطابق اب تک تین غیر ملکی کوہ پیماؤں کی لاشیں تلاش کر کے نکال لی گئی ہیں۔ جن میں امریکہ کی سارہ مالوری گیس، عمان کی نادھیرا احمد عبداللہ الحارثی اور نیپال کے پُر بہادر گرنگ شامل ہیں۔ ابتدائی طور پر فوج کی جانب سے چار لاشیں ملنے کی خبر دی گئی تھی، جسے بعد میں درست کرتے ہوئے تصدیق کی گئی کہ دو لاشیں اور ایک باڈی پارٹ ملا ہے۔
لاپتہ ہونے والے نامور کوہ پیما نِرمُل پُرجا (نِمز) نے اس سے قبل آکسیجن کے بغیر دنیا کے تمام 14 بلند ترین پہاڑوں کو سر کرنے کا عالمی ریکارڈ بنایا تھا، جس پر نیٹ فلکس نے مشہور ڈاکومینٹری بھی بنائی تھی۔ وہ اس بار آکسیجن کے بغیر دوبارہ تمام 14 چوٹیوں کو سر کرنے کے اپنے دوسرے مشن پر تھے اور براڈ پیک ان کی اس فہرست کا آخری مراحل میں سے ایک تھا۔ ان کے برانڈ ‘نِمزڈائی اسٹور’ نے تصدیق کی ہے کہ وہ ریسکیو ٹیموں کے ساتھ رابطے میں ہیں اور حالات کی درست معلومات کا انتظار کیا جا رہا ہے۔
گلگت بلتستان پولیس اور الپائن کلب کے مطابق یہ حادثہ جمعرات کی دوپہر بارہ بجے کے قریب پیش آیا۔ انتہائی ناہموار خطے، شدید سردی اور خراب موسمی حالات کی وجہ سے ریسکیو اور سرچ آپریشن میں شدید مشکلات کا سامنا ہے۔ ہائی ایلٹیٹیوڈ پورٹرز اور ریسکیو ٹیمیں انتہائی احتیاط کے ساتھ لاشوں کو بیس کیمپ تک منتقل کرنے کی کوششوں میں مصروف ہیں۔